იტალიელმა მკვლევრებმა რენესანსის ოსტატის, რაფაელის, სახის 3D რეკონსტრუქცია განახორციელეს, რაც, მათი თქმით, ერთხელ და სამუდამოდ ამტკიცებს, რომ მხატვარი რომის პანთეონში იყო დაკრძალული.

თუმცა მკვლევრებმა კიდევ ერთი, უფრო გასაოცარი აღმოჩენაც გააკეთეს — ისინი ფიქრობენ, რომ მხატვარი, რომელიც 1483-1520 წლებში ცხოვრობდა, ავტოპორტრეტების ხატვისას საკუთარ ცხვირს "ასწორებდა" და საკუთარ ვიზუალს უფრო იდეალიზებულად გამოსახავდა.

რომის ტორ-ვერგატას უნივერსიტეტის მკვლევრებმა Vigamus Foundation-ისა და ურბინოს რაფაელის აკადემიის ექსპერტებთან ერთად შექმნეს ოსტატის სახის 3D კომპიუტერული რეკონსტრუქცია, რათა გაეგოთ, რომის პანთეონში ნაპოვნი ნეშტი ნამდვილად მას ეკუთვნოდა თუ არა.

1833 წელს ნარჩენები პანთეონში რაფაელის საფლავიდან ამოიღეს, თუმცა ექსპერტები დაზუსტებით ვერ ამბობდნენ, ნამდვილად მას ეკუთვნოდა თუ არა ისინი — გათხრებისას ასევე იპოვეს რაფაელის მოსწავლეების ნარჩენები, აგრეთვე რამდენიმე დაუსრულებელი ჩონჩხი.

"ნარჩენების იდენტობის ამოუცნობლობა 'ღვთიური ფერმწერის', რომელსაც ჯორჯო ვაზარი 'მოკვდავ ღმერთს' უწოდებდა, არაერთ მოყვარულს აწუხებდა საუკუნეების განმავლობაში", — თქვა რომის ტორ-ვერგატას უნივერსიტეტის მოლეკულური ბიოლოგიის პროფესორმა მატია ფალკონიმ.

საფლავიდან ამოღებული თავის ქალის თაბაშირის სხმულის გამოყენებით მეცნიერებმა 3D რენდერი შექმნეს და ეს რეკონსტრუქცია მხატვრის ავტოპორტრეტებსა და სხვების დახატულ პორტრეტებს შეადარეს.

ამის შედეგად, მკვლევრები ვარაუდობენ, რომ 1833 წელს ამოღებული ჩონჩხი ნამდვილად იტალიელ ოსტატს ეკუთვნოდა, რამაც გარდაცვლილი მხატვრის ცხვირის საიდუმლოც გამოააშკარავა.

"ცხვირი, რომელიც სახის რეკონსტრუქციით მივიღეთ, აშკარად უფრო რელიეფურია, ვიდრე რაფაელის ავტოპორტრეტებში დახატული. შესაბამისად, გვგონია, რომ რაფაელი თავის პორტრეტებში საკუთარ თავს ალამაზებდა", — უთხრა ფალკონიმ CNN-ს.

"თავის მხატვრულ ხედვაში, თავის ნახატებში, რაფაელი ადამიანთა მშვენიერებას გამოსახავდა. ამის ნათელი მაგალითია [რაფაელის] პორტრეტი რომის პაპ ლეო X-ისა, რომელიც ნამდვილად არ იყო ფიზიკურად მოხდენილი. რაფაელი სილამაზის 'ამოკრებას' ახერხებს", — დაამატა მან.

"ეს კვლევა პირველად გვაწვდის იმის მტკიცებულებას, რომ რომის პანთეონში 1833 წელს ამოღებული ჩონჩხი ნამდვილად რაფაელს ეკუთვნის, და ის გზას უხსნის ჩონჩხის ნარჩენებზე შესაძლო სამომავლო მოლეკულურ კვლევებს, რომელთა მიზანიც ამ იდენტობის გამყარება და დნმ-თან დაკავშირებული ზოგიერთი ასპექტის დადგენა იქნება: ფენოტიპური ელემენტები (თვალის, თმისა და კანის ფერი), გეოგრაფიული წარმომავლობა და რაიმე ისეთი გენეტიკური მარკერების თანაობა, რომლებიც დაავადებებისადმი მიდრეკილებას აჩვენებს", — თქვა ტორ-ვერგატას უნივერსიტეტის მოლეკულური ანთროპოლოგიის პროფესორმა ოლგა რიკარდსმა.

"სხმულზე კბილების სრული ნაკრებიც ვიპოვეთ და გასაოცარია, თუ რამდენად იდეალურად ხელუხლებელია ისინი, რაც ძალიან იშვიათია მე-16 საუკუნის 37 წლის კაცისთვის. ეს ნიშნავს, რომ რაფაელი თავს კარგად უვლიდა, მათ შორის ჰიგიენისა და კვების თვალსაზრისით", — ამბობს ფალკონი.