ინგლისის ქალაქ ბრისტოლში იმ ადგილას, სადაც ედვარდ კოლსტონის ძეგლი იყო, რამდენიმე საათის წინ ცნობილი ანტირასისტული მოძრაობის — Black Lives Matter (შავკანიანთა სიცოცხლე მნიშვნელოვანია) პროტესტის ერთ-ერთი მონაწილის, ჯენ რაიდის ქანდაკება აღმართეს.

ქალაქის მერის განცხადებით, ეს ქმედება ადგილობრივ ხელისუფლებასთან შეთანხმებული არ იყო და ძეგლი ერთ-ერთმა ხელოვანმა თავისი სურვილით, როგორც პროტესტის გამოხატულება, აღმართა.

ედვარდ კოლსტონის ძეგლი ივნისში ანტირასისტული პროტესტის ფარგლებში ჩამოაგდეს: ის ცნობილი მონათმფლობელი იყო, რომელიც მე-17 საუკუნეში მოღვაწეობდა.

სწორედ ძეგლის ჩამოგდების შემდეგ, 7 ივნისს მის ადგილას აქციის ერთ-ერთი მონაწილე ჯენ რაიდი, როგორც თავად აცხადებს, სპონტანურად ზევით შემართული ხელით დადგა, რა დროსაც მას ფოტო გადაუღეს და ეს კადრი სოციალურ მედიაში სწრაფად გავრცელდა.

ჯენ რაიდი აქციაზე კოლსტონის ძეგლის ჩამოგდების შემდეგ.

ფოტო: biggiesnug/instagram

სწორედ ამ ფოტოს შთაგონებით ხელოვანმა მარკ ქუინმა გადაწყვიტა, რომ დროებითი ინსტალაცია შეექმნა, რათა ადამიანებისთვის კიდევ ერთხელ შეეხსენებინა რასიზმის მწვავე პრობლემები.

ძეგლის შექმნაზე მასთან ერთად ჯენ რაიდიც თანამშრომლობდა: ხელოვანმა აქციის ამ მონაწილეს თავის სახელოსნოში კიდევ ერთხელ გადაუღო ფოტოები და 3D პრინტერის საშუალებით მისი ქანდაკებაც შექმნა.

ქუინმა დღეს ის ბრისტოლის შუაგულში ედვარდ კოლსტონის ძეგლის ადგილას განათავსა, როგორც Black Lives Matter-ის პროტესტის ერთ-ერთი ფორმა. კოლსტონის ძეგლი 1895 წლიდან იყო ბრისტოლის ცენტრში აღმართული.

ჯენ რაიდი თავისი ძეგლის წინ.

ფოტო: Graeme Robertson/The Guardian

BBC-ის ცნობით, ქალაქის მერმა ამ ფაქტთან დაკავშირებით აღნიშნა, რომ ხელოვან მარკ ქუინს ამ გადაწყვეტილების მიღებისას ადგილობრივი ხელისუფლებისთვის არ მიუმართავს და შესაბამისად, არც კანონიერი ნებართვა ჰქონდა. მისივე თქმით, ჯერჯერობით გადაწყვეტილი არ არის, თუ რა ბედი ეწევა ამ ახალ ინსტალაციას ან რითი ჩანაცვლდება ის და იმედოვნებს, რომ ამ გადაწყვეტილებას მოქალაქეებთან ერთად მიიღებს:

"ცვლილებები გვჭირდება. მნიშვნელოვანი ცვლილებები, რომლებიც გვაპოვნინებს გზას, რომ ადამიანები ერთმანეთთან უფრო ახლოს იყვნენ. არის ერთი აფრიკული ანდაზა, რომელიც გვეუბნება, რომ თუ გინდა სწრაფად წახვიდე წინ, მაშინ მარტო უნდა იყო, ხოლო თუ გინდა უფრო შორს წასვლა შეძლო, მაშინ ეს სხვებთან ერთად უნდა გააკეთო", — განაცხადა ბრისტოლის მერმა, მარვინ რიზმა.

შეგახსენებთ, რომ მაისში აშშ-ის შავკანიანი მოქალაქის, ჯორჯ ფლოიდის გარდაცვალების გამო მსოფლიოს მრავალ კუთხეში რასიზმის წინააღმდეგო საპროტესტო აქციები გაიმართა, რომლის დროსაც სხვადასხვა ქვეყანაში იმ ცნობილი პირების ძეგლები ჩამოაგდეს, რომლებიც რასიზმში იყვნენ დადანაშაულებულები.