პოლიტიკური ცენტრი გირჩის ლიდერი ზურაბ ჯაფარიძე საქართველოს მთავრობას ეკონომიკის განვითარებისთვის 10 პუნქტიან გეგმას სთავაზობს, რომელიც მისი თქმით, დღესვე უნდა გამოცხადდეს.

ჯაფარიძის ინიციატივით, კონსტიტუციით უნდა აიკრძალოს მთავრობის მიერ შიდა ვალის აღება და ბიუჯეტის დეფიციტი. ის ასევე მოუწოდებს მთავრობას, 2017 წლისთვის მოახდინოს კანაფის ლეგალიზაცია და ყოველგვარი ნარკოტიკის დეკრიმინალიზაცია.

გირჩის ლიდერი მთავრობას ხარჯების შემცირებისკენ და თავისუფალი სავალუტო რეჟიმის დაწესებისკენ მოუწოდებს.

იხილეთ ზურაბ ჯაფარიძის 10-პუნქტიანი გეგმა სრულად.

საქართველოს მთავრობა

რა არის გასაკეთებელი სასწრაფოდ - რეალურად საჭირო 10 პუნქტიანი გეგმა (ყოველგვარი ახსნა განმარტებების გარეშე):

დღესვე უნდა გამოაცხადოს შემდეგი 10 პუნქტიანი გეგმა:

  1. შემდეგი 8 წლის განმავლობაში მთავრობის ხარჯები შემცირდება მშპ-ს 32-დან 15%-მდე და შემცირების საფეხურები გაიწერება კონსტიტუციაში. კონსტიტუციით განისაზღვრება რომ მთავრობის ხარჯები მშპს-თან მიმართებაში არ შეიძლება იყოს 15%-ზე მეტი
  2. შემდეგი 8 წლის განმავლობაში მთავრობის საგარეო ვალი მშპ-სთან მიმართებაში შემცირდება 25%-მდე და შემცირების საფეხურები გაიწერება კონსტიტუციაში. კონსტიტუციით განისაზღვრება რომ მთავრობის საგარეო ვალი მშპ-სთან მიმართებაში არ შეიძლება იყოს 25%-ზე მეტი
  3. მთავრობას კონსტიტუციით აეკრძალება შიდა ვალის აღება
  4. კონსტიტუციით აიკრძალება ბიუჯეტის დეფიციტი
  5. კონსტიტუციით განისაზღვრება რომ საქართველოში დაშვებულია თავისუფალი სავალუტო რეჟიმი. ახალ რეჟიმზე გადასვლა მოხდება 2017 წლის განმავლობაში. გადასახადების აკრეფა და სახელმწიფო ხარჯების გაწევა ხდება აშშ დოლარში
  6. 2017 წლიდან უქმდება მოგების, საშემოსავლო, იმპორტის და ქონების გადასახადები. 2017 წლის ბიუჯეტის საშემოსავლო და ხარჯვითი ნაწილი მცირდება 2 მილიარდი ლარით (ბიუროკრატიის შემცირებისა და უაზრო პროგრამების შეკვეცის ხარჯზე)
  7. 6 თვეში მიწა უსასყიდლოდ ურეგისტრირდებათ ფაქტობრივ მფლობელებს
  8. ჰოლანდიური აუქციონის წესით ხდება სახელმწიფოს საკუთრებაში არსებული აქტივების პრივატიზაცია, მათ შორის სახელმწიფო შპს-ების, სსიპ-ების და აიპ-ების
  9. 2017 წლიდან ხდება ყველა ნარკოტიკის დეკრიმინალიზაცია და კანაფის ლეგალიზაცია
  10. 2017 წლიდან ხდება განათლების სფეროს სრული დერეგულაცია

"არაა რთული, თუ საქმის გაკეთება გინდათ" - წერს ზურაბ ჯაფარიძე.