სახალხო დამცველის ანგარიშის "ქალთა უფლებრივი მდგომარეობა და გენდერული თანასწორობა" მიხედვით, 2015 წელს, 611 არასწრულწლოვანი პირის ქორწინება დარეგისტრირდა, ხოლო 2014 წელს - 665. მათ შორის 95% გოგო იყო.

ომბუდსმენი სხვადასხვა უწყების მიერ აღრიცხულ მონაცემებს ეყრდნობა და აცხადებს, რომ ბავშვის დაბადების მომენტისთვის, 2015 წელს, 1 449 არასრულწლოვანი მშობელი დაფიქსირდა და ოჯახის შექმნის მიზნით, 13-დან 17 წლამდე 408 მოსწავლემ მიატოვა სკოლა. ხოლო, 168 შემთხვევაში სწავლას თავი 18 წელს მიღწეულმა პირმა დაანება.

სახალხო დამცველი აღნიშნული მონაცემების შესაძლო უზუსტობაზე წერს, რადგან ქვემო ქართლში სკოლის პედაგოგები არ იყვნენ ინფორმირებულები იმის შესახებ, რომ აუცილებელია ბავშვთა სკოლის მიტოვების მიზეზების შესახებ სტატისტიკის წარმოება და განათლების სამინისტროსთვის მიწოდება.

ასევე, ომბუდსმენი სოციალური მომსახურეობის სააგენტოს არასათანადო რეაგირებაზეც საუბრობს:

2015 წელს, საქართველოში 29 551 აბორტი გაკეთდა

დაავადებათა კონტროლის ეროვნული ცენტრი

"იმ შემთხვევაში თუ სახეზე არ არის იძულებითი ქორწინება, სოციალური მომსახურეობის სააგენტოს უჭირს ადრეულ ასაკში ქორწინების როგორც პრობლემის იდენთიფიცირება. 2015 წელს სოციალური მომსახურეობის სააგენტოს მიერ ადრეულ ასაკში ქორწინების შესახებ შესწავლილი რაოდენობის მთლიანი რაოდენობა 47 იყო, რაც ძალიან ცოტაა, თუ სხვა უწყებების მიერ აღრიცხულ შემთხვევებს შევადარებთ".

სახალხო დამცველის განმარტებით, რეგიონებში გამართული საინფორმაციო შეხვედრების შემდეგ გამოიკვეთა რომ სოციალურ სააგენტოებს ისევე როგორც სკოლებს უჭირთ კანონით გათვალისწინებული ვალდებულებების განხორციელება ენობრივი ბარიერის გამო.

როგორც ანგარიშში წერია, აბორტების უმრავლესობა (11 018) თბილისში ფიქსირდება. მას მოჰყვება იმერეთი (4 128) და აჭარის რეგიონი (3 774).

ასაკობრივ ჭრილში აბორტების ყველაზე მეტი რაოდენობა 25-დან 29 წლამდე ასაკის ქალებს შორის გაკეთდა (8 465).

2015 წელს, 15 წლამდე გოგონებში აბორტის 10 შემთხვევა დაფიქსირდა, მათგან 4 - ქვემო ქართლში, 2 - თბილისში, დანარჩენი - კახეთში, სამეგრელოში, შიდა ქართლსა და სამცხე ჯავახეთში

ომბუდსმენის ანგარიშის თანახმად, საქართველოს კანონმდებლობა კრძალავს სქესის შერჩევის მიზნით ორსულობის შეწყვეტას სამედიცინო ჩარევით. თუმცა, გაეროს გენდერული უთანასწორობის გლობალური ინდექსის მონაცემების მიხედვით, საქართველო სქესთა თანაფარდობის მონაცემების მიხედვით დაბადებისას 145 ქვეყანას შორის 138-ე ადგილზეა.

2015 წლის გაეროს მოსახლეობის ფონდის კვლევის თანახმად, საქართველოში სელექციური აბორტის სამი მიზეზი განისაზღვრა: საზოგადოებაში ვაჟისადმი უპირატესობის მინიჭება, შობადობის კლება 90-იანი წლების შემდე და რეპროდუქციულ ტექნოლოგიაზე ხელმისაწვდომობა.

ომბუდსმენის ანგარიშის პრეზენტაცია 13 მაისს, სასტუმრო ქორთიარდ მარიოტში გაიმართა, რომელსაც ადგილობრივი და საერთაშორისო არასამთავრობო ორგანიზაციები ესწრებოდნენ.