პრემიერმინისტრი გიორგი გახარია აცხადებს, რომ თავისი ყოფილი თანაგუნდელისა და ყოფილი პრემიერის, გიორგი კვირიკაშვილის განცხადებებზე კომენტარს არ გააკეთებს.

"ყველამ ფასეულობებიდან გამომდინარე გააკეთოს თავისი განცხადებები. არ მინდა ამაზე კომენტარის გაკეთება", — განაცხადა გახარიამ ჟურნალისტებთან.

გიორგი კვირიკაშვილმა 9 აპრილს TV პირველთან განაცხადა, რომ პრემიერობისას "რაღაც პერიოდში" პარტიის თავმჯდომარისგან, ბიძინა ივანიშვილისგან "თავისუფლება" ჰქონდა.

როგორც გიორგი გახარია აცხადებს, ის მითითებებს არავისგან იღებს და გუნდურად მუშაობენ.

"თუ ვინმე რაიმე მითითებას მაძლევს, ქვეყნის ინტერესიდან გამომდინარეა. და ჩვენი გადაწყვეტილებების მიღების პროცესი არის აბსოლუტურად გამჭვირვალე. ყველა ჩვენს შეხვედრას, თათბირს ყველაფერს ხედავთ", — აღნიშნა გახარიამ.

TV პირველთან სატელეფონო საუბრის დროს გიორგი კვირიკაშვილმა აღნიშნა, რომ ერთპიროვნული მმართველობა კარგი არ არის. მისივე თქმით, პრემიერობის პერიოდში დიდი ხარისხის თავისუფლება ჰქონდა:

"მერე რაღაც პერიოდში მას [ბიძინა ივანიშშვილს] აღარ მოეწონა რაღაცეები, როგორც ყველამ იცის ეს და ის ჩაერია ძალიან აქტიურად და დაბრუნდა პოლიტიკაში".

გიორგი კვირიკაშვილი ქართული ოცნების პრემიერმინისტრი იყო 2015 წლის 30 დეკემბრიდან 2018 წლის 13 ივნისის ჩათვლით. კვირიკაშვილი პრემიერ-მინისტრის თანამდებობიდან მალევე მას შემდეგ გადადგა, რაც ბიძინა ივანიშვილი პოლიტიკაში ოფიციალურად დაბრუნდა და პარტიის თავმჯდომარედ დაინიშნა.

მისი წასვლის ერთ-ერთ მთავარ მიზეზად მმართველი გუნდი მოსახლეობაში ჭარბვალიანობასა და ეკონომიკურ რეფორმების არაეფექტურობას ასახელებდა. თავად კვირიკაშვილმა კი თანამდებობის დატოვებისას ხმამაღლა განაცხადა გუნდში არსებულ დაპირისპირებასა და შეუთანხმებლობაზე. იქამდე კი თავისი გადადგომის შესახებ გავრცელებული ცნობები რამდენჯერმე უარყო.