პარტია ლელოს დამფუძნებლის, მამუკა ხაზარაძის თქმით, 2020 წლის არჩევნებზე დამოუკიდებლად მიიღებენ მონაწილეობას, თუმცა მათი კარი ღიაა მსურველებისთვის, მათ შორის ქართული ოცნების, ნაციონალური მოძრაობის ან ევროპული საქართველოს წევრებისთვის. ლელო ოპოზიციის შეთანხმებას არ უერთდება და მაჟორიტარებს ყველა ოლქში წარადგენს.

"ჩვენ გვაქვს ჩვენი ფერი, ჩვენი იდეოლოგია, ჩვენი პროგრამა და ჩვენ დამოუკიდებლად გავალთ არჩევნებზე. თუ ვინმეს უნდა შემოერთება, ჩვენი კარი ღიაა.

აქვე მინდა ხაზი გაუსვა, კარები ღიაა ოცნების ხალხისთვის, ვინც მართლა გული და სული ჩადო და შეცვალა წინა ხელისუფლება და ასევე, ოპოზიციური, ნაციონალური მოძრაობა იქნება, თუ ევროპული საქართველო", — განაცხადა ხაზარაძემ.

მანვე აღნიშნა, რომ ლელო არა ამ არჩევნებისთვის, არამედ "გრძელვადიანი მოგზაურობისთვის" შეიქმნა, რასაც გრძელვადიანი სტრატეგია სჭირდება, ამიტომ მათ სურთ გაერთიანება იდეოლოგიის ირგვლივ. მისი თქმით, 30 წლის განმავლობაში ქართული პოლიტიკა არსებობს პრინციპით "ყველა ერთის წინააღმდეგ", რაც შედეგობრივად არავის წაადგა და ეს პარადიგმა უნდა შეიცვალოს.

"რომ დაამარცხებ, მერე მოტრიალდები და მიხვდები, ვისთან ერთად დაამარცხე, რომელთანაც შენ საერთო არაფერი გაკავშირებს, არც მორალური, არც ისტორიის თვალსაზრისით, არც პოლიტიკური გემოვნების თუ იდეოლოგიის თვალსაზრისით. მე ყველაზე არ მაქვს ლაპარაკი. მერე იწყება ისევ ქაოსი. მერე აღმოჩნდება ისევ ვიღაცა, რომელიც აღმოჩნდება პრობლემა ამ პოლიტიკის", — განაცხადა მან.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო კი აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: