ევროპული საქართველოს წევრის, სერგი კაპანაძის თქმით, მნიშვნელოვანია, რომ მაჟორიტარულ ოლქებში ოპოზიციურ ძალებს შორის კოორდინირება და შეთანხმება პირველ ტურში მოხდეს.

მისი განმარტებით, მეორე ტურში ისედაც იგულისხმება, რომ ოპოზიციურმა ძალებმა ერთმანეთს მხარი უნდა დაუჭირონ. მისი თქმით, ახლა საუბარი იმაზე, რომ ვიღაც ვიღაცას მხარს დაუჭერს, სწორი მიდგომა არ არის.

"უაღრესად მნიშვნელოვანია, რომ ოპოზიციურმა ძალებმა მოახდინონ საერთო მაჟორიტარულ კანდიდატებზე შეთანხება ან პოზიციების კოორდინირება მაჟორიტარულ ოლქებში. ეს შეიძლება იყოს თანამშრომლობა, შეიძლება იყოს კანდიდატების არდაყენება, შეიძლება საერთო კანდიდატებზე შეთანხმება, მაგრამ ჩვენ კარგად უნდა გვესმოდეს, რომ ჩვენი ამოცანა პირველ ტურში ბიძინა ივანიშვილის დამარცხება უნდა იყოს. ამიტომ, ახლა მეორე ტურზე საუბარი, მაშინ, როდესაც ოპოზიციაში დიდი პროცესები არის დაწყებული, არ მგონია, სწორი იყოს. პირველ ტურში მაჟორიტარებზე შეთანხმება და კოორდინირება ამ ეტაპზე პასუხისმგებლობის გრძნობის მქონე ყველა ოპოზიციური ძალის ამოცანა უნდა იყოს", — განაცხადა კაპანაძემ.