ნაციონალური მოძრაობის ლიდერის, ნიკა მელიას განცხადებით, არის ოლქები, სადაც ოპოზიციას ერთი კანდიდატი უნდა ჰყავდეს, მაგრამ ზოგიერთ ოლქში შესაძლებელია რამდენიმე კანდიდატის წარდგენა. მისი თქმით, ნაციონალური მოძრაობა ყველაფერს გააკეთებს, რომ კონსესუსი შედგეს, როგორც პარტიაში, ასევე ოპოზიციაში.

"ბუნებრივია, შესაძლებელია, რომ ცალკეულ აღებულ ოლქებში, საერთო შეთანხმების საფუძველზე, ოპოზიციური პარტიების ინტერესი იყოს, რომ ყავდეს არა ერთი ან ორი კანდიდატი, შეიძლება სამიც, რომ ამით დავუპირისპირდეთ ოლიგარქს, გონივრულად. არის ოლქები, სადაც ცალსახად უნდა იყოს წარმოდგენილი ერთი ოპოზიციური კანდიდატი", — განაცხადა მან.

საკონსულტაციო ფორმარტით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.