ევროპული საქართველოს ერთ-ერთი ლიდერის, გიგი უგულავას განცხადებით, საერთო მაჟორიტარულ კანდიდატებზე შესათანხმებლად დიდმა და გამოცდილება პარტიებმა უფრო მეტი უნდა დათმონ. ამ თემაზე კომენტარი მან მთავარ არხთან გააკეთა.

"ლელოს გარეშე ოპოზიციური მაჟორიტარების ერთობა შესაძლებელია, ლეიბორისტების გარეშე ძალიან რთულია, მაგრამ მაინც შესაძლებელია, ევროპული საქართველოს გარეშე ეს არ გამოვა და ნაციონალების გარეშე საერთოდ არ გამოვა. ამიტომ ვინც უფრო დიდი პარტიაა, ვისაც მეტი გამოცდილება აქვს, შეიძლება მეტი ამბიცია აქვს, იმან მეტი უნდა დათმოს", — თქვა გიგი უგულავამ.

მისი განცხადებით, ესაა ის ფორმა, რომლითაც ბიძინა ივანიშვილის დამარცხება შესაძლებელი იქნება, ამიტომ ოპოზიცია ერთიან კანდიდატებზე უნდა შეთანხმდეს.

საკონსულტაციო ფორმარტით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.