ევროპული საქართველოს ლიდერის, გიგა ბოკერიას აზრით, მაჟორიტარული ოლქების გადანაწილებასთან დაკავშირებით ზოგიერთი პოლიტიკოს ცდება, ხოლო ზოგიერთ შემთხვევაში შეიძლება, ადგილი ჰქონდეს პოლიტიკურ სიხარბეს. ეს კომენტარი მან მთავარ არხთან გააკეთა.

"მესმის სხვადასხვა მოსაზრებები შეიძლება იყოს, თავიდანვე იყო სხვადასხვა მოსაზრებები, ზოგი ძალიან პატივცემული პოლიტიკოსი ჩემი აზრით, ცდება და გვინდა გვქონდეს დისკუსია. ზოგ შემთხვევაში შეიძლება ადგილი ჰქონდეს უფრო ღრმა პრობლემას — პოლიტიკური სიხარბის და სწორედ ამ კონსესუსის დარღვევის, რომ არავის აღარ ჰქონდეს ერთპიროვნული ძალაუფლება", — თქვა გიგა ბოკერიამ.

დეპუტატმა აღნიშნა, რომ "ქვეყნისთვის რისკების შესამცირებლად" და ივანიშვილის დასამარცხებლად მნიშვნელოვანია, რომ გამარჯვება ოპოზიციამ პირველივე ტურში მოიპოვოს. განსაკუთრებით კი სპეციფიკურ ოლქებში, გიგა ბოკერიამ მათ შორის თბილისი დაასახელა.

საკონსულტაციო ფორმარტით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.