ქართული ოცნებიდან წამოსული დეპუტატის, ეკა ბესელიას განცხადებით, მეორე ტურში მმართველი გუნდის კანდიდატს მხარს არ დაუჭერს, რადგან ამ პარტიის წევრებმა პრინციპებს უღალატეს. მისივე თქმით, მეორე ტურში არც ნაციონალური მოძრაობის ნებისმიერ კანდიდატს დაუჭერს მხარს.

"ქართული ოცნების კანდიდატებს შორის მე არ მეგულება არავინ, ვისაც ხმას მივცემ. არ ვიცი, ვინ შეიძლება იყოს. რამდენიმე ადამიანი დამრჩა იმ პარტიაში, რომელიც ჩემი შექმნილია და მე სხვა ემოცია მაქვს, ბუნებრივია, იმ პარტიის მიმართ. რამდენიმე ადამიანი მეგულება, ვისთან ერთადაც ეს პარტია შევქმენით და უმრავლესობა არავითარი ორგანული და ისტორიული, პოლიტიკური წარსულით არ არის დაკავშირებული იმ პრინციპებთან, რის გამოც ეს პარტია შეიქმნა.

როგორ უნდა მივცე ხმა მათ, ვინც დავტოვე სწორედ იმის გამო, რომ ყველა პირობას უღალატეს და ყველა პრინციპს უღალატეს და საკუთარ ამომრჩეველს ზურგი შეაქციეს", — განაცხადა მან.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: