ქართული ოცნებიდან წამოსული დეპუტატი ეკა ბესელია აცხადებს, რომ 2020 წლის არჩევნებისთვის მაჟორიტარობაზე ფიქრობს. მისი თქმით, მაჟორიტარობაზე კენჭს ფოთში აღარ იყრის და საბოლოო გადაწყვეტილებას ოლქის შესახებ მაშინ მიიღებს, როცა სარჩევნო კოდექსში ცვლილება შევა.

"მე ვფიქრობ მაჟორიტარობაზე, გულწრფელად რომ გითხრათ, იმიტომ რომ ამ ყველაფერს ვუყურებ საარჩევნო შედეგის ჭრილში და არა იმ ჭრილში, მე ეკა ბესელიას რა მინდა და რა არ მინდა. მე რა მინდა, ეგ დიდი ხანია დამავიწყდა, რაც პოლიტიკაში ვარ. [...]

ფოთში დანამდვილებით შემიძლია გითხრათ, რომ არ ვიქნები. მე მგონია, სწორია ეს გადაწყვეტილება. მე ვარ წარმოშობით ფოთიდან და ერთი მაჟორიტარული პერიოდი იყო სრულიად საკმარისი იმისთვის, რომ რაც შემეძლოა, გამეკეთებინა ამ ქალაქისთვის", — განაცხადა მან მთავარი არხის ეთერში.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: