უზენაესი სასამართლოს პლენუმმა ვასილ როინიშვილი საკონსტიტუციო სასამართლოს მოსამართლედ აირჩია. ამის შესახებ გიორგი მიქაუტაძემ ჟურნალისტებს განუცხადა.

არასამთავრობო ორგანიზაციები და პოლიტიკოსების ნაწილი აცხადებდა, რომ პროცესი გაუმჭვირვალე იყო და არსებობდა გავლენების გაძლიერების საფრთხე. ისინი მოუწოდებდნენ პლენუმს, რომ შეერჩიათ, მაგრამ არ დაემტკიცებინათ კანდიდატი. კრიტიკის საგანი გახდა ისიც, რომ უცნობი იყო მოსამართლის კანდიდატურა. პასუხად გიორგი მიქაუტაძე განმარტავს, რომ საკონსტიტუციო სასამართლოს დაკომპლექტების წესი არის განსხვავებული.

"მას აქვს ძალიან დიდი გამოცდილება, როგორც სისხლის სამართლის, ასევე, სამოქალაქო და ადმინისტრაციული სამართლის მიმართულებით. 10 წლის განმავლობაში და უფრო მეტი, ის იყო უზენაესი სასამართლოს წევრი და აქვს ძალიან მაღალი კვალიფიკაცია", — განაცახადა მიქაუტაძემ და მას წარმატებული საქმიანობა უსურვა.

როინიშვილი უარყოფს გავრცელებულ ინფორმაციას იმის შესახებ, რომ ის საკონსტიტუციოს თავმჯდომარედ დაინიშნება. მისი თქმით, მსგავსი შემოთავაზება არ მიუღია.

ასევე, როინიშვილი უარყოფს სასამართლოში კლანის არსებობას და აცხადებს, რომ მიხეილ ჩინჩალაძესთან კარგი ურთიერთობა აქვს. არასამთავრობო სექტორი უკვე დიდი ხანია სასამართლოში კლანის არსებობაზე საუბრობს. მიხეილ ჩინჩალაძეს ისინი კლანის ერთ-ერთ ხელმძღვანელად მოიაზრებენ.

არანაირი კლანი არ არის, რას ქვია კლანი... ეგება მე ვარ თავმჯდომარე ამ კლანის — საკონსტიტუციოს ახალი მოსამართლე

ვასილ როინიშვილი 2008-2009 წლებში საქართველოს მთავარი პროკურორის მოადგილე იყო. მანამდე 2006-2008 წლებში კი აჭარის ავტონომიური რესპუბლიკის პროკურორი. სხვადასხვა დროს ის იყო, უზენაესი სასამართლოს მოსამართლე, უზენაესი სასამართლოს თავმჯდომარის მოადგილე, სამოქალაქო საქმეთა პალატის თავმჯდომარე, სადისციპლინო პალატის წევრი.