მას შემდეგ, რაც ტვიტერმა აშშ-ს პრეზიდენტის ტვიტს "პოტენციურად შეცდომაში შემყვანი" უწოდა, დონალდ ტრამპმა სოციალური მედიის კომპანიების წინააღმდეგ ბრძანებას მოაწერა ხელი.

აღმასრულებელ ბრძანებაში წერია, რომ იურიდიული იმუნიტეტი აღარ გავრცელდება ონლაინ პლატფორმებზე, ფეუსბუქსა და ტვიტერზე, თუკი ისინი მომხმარებელთა მიერ გავრცელებული პოსტის შინაარსს შეცვლიან.

დოკუმენტში, ასევე, ნათქვამია, რომ იმუნიტეტი არ გავრცელდება არც პოსტების დაბლოკვის შემთხვევაში, იმ მიზეზით, რაც აღწერილი არ არის ვებსაიტის სერვისის პირობებში.

ოვალურ ოფისში გამართულ პრესკონფერენციაზე, დონალდ ტრამპმა განაცხადა, რომ თავისუფალი სიტყვა ამერიკის ისტორიაში ერთ-ერთი ყველაზე დიდი საფრთხის წინაშეა:

"სოციალური მედიის მონოპოლისტები აშშ-ში საჯარო და პირადი კომუნიკაციების დიდ ნაწილს აკონტროლებენ. მათ ჰქონდათ ძალაუფლება ჩაესწორებინათ, დაეცენზურებინათ, აეკრძალათ, დაემალათ ვირტუალურად კომუნიკაციის ნებისმიერი ფორმა მოქალაქეებსა და დიდ საზოგადოებრივ აუდიტორიას შორის".

როგორც ამერიკის ხმა წერს, 27 მაისს შეერთებული შტატების პრეზიდენტი ტვიტერს შურისძიებით დაემუქრა. მანამდე, სოციალური მედიის პლატფორმამ მის განცხადებებზე ფაქტების გადამოწმების გაფრთხილების იარლიყი მიამაგრა. პრეზიდენტმა ტრამპმა ტვიტერს 2020 წლის საპრეზიდენტო არჩევნებში ჩარევა და სიტყვის თავისუფლებაზე თავდასხმა დააბრალა.

სამშაბათს პრეზიდენტ ტრამპის ტვიტზე გაჩნდა თან დართული შეტყობინება სათაურით: "ტრამპი უსაფუძვლოდ აცხადებს, რომ წერილობით ხმის მიცემა არჩევნების გაყალბებას გამოიწვევს". გაფრთხილებას თან ახლავს რამდენიმე მასალა, დართული აქვს "ფაქტ-ბოქსი", რაც ფაქტების ნუსხას, სიას ნიშნავს.

ტვიტერის პრესსპიკერი აცხადებს, რომ მათი უპრეცედენტო ნაბიჯი ახალ პოლიტიკას ეფუძნება, რომელიც არ დაუშვებს არასწორი ინფორმაციის გავრცელებას.