თურქეთის საგარეო საქმეთა მინისტრმა ჰაქან ფიდანმა განაცხადა, რომ რუსეთსა და უკრაინას შორის სტამბოლში გამართული მოლაპარაკებების დროს "ლიდერთა სამიტის თურქეთში ჩატარების თაობაზე პრინციპული შეთანხმება იქნა მიღწეული." ამის შესახებ ინფორმაციას უკრაინული მედია თურქული მედიასაშუალება NTV-ზე დაყრდნობით ავრცელებს.

ფიდანის თქმით, რუსეთის ომს უკრაინის წინააღმდეგ "ძალიან სერიოზული რეგიონული და გლობალური შედეგები აქვს."

"ჰუმანიტარული ტრაგედიის მიღმა, საერთაშორისო არენაზე ვდგავართ რეალობის წინაშე, რომელიც შესაძლოა კიდევ უფრო დიდი ომისა და დაპირისპირების მიზეზი გახდეს. ეს არის რთული და ძვირადღირებული ომი — ომი, რომელშიც ბირთვული იარაღის გარდა თითქმის ყველაფერი გამოიყენება," — განაცხადა ფიდანმა.

მინისტრმა აღნიშნა, რომ სტამბოლში გამართული მოლაპარაკებების მესამე რაუნდის დროს განხილულ იქნა, რა პირობებში შეიძლება შეხვდნენ ქვეყნების ლიდერები.

"მიღწეული იქნა ფუნდამენტური შეთანხმება, რომ სამიტი ლიდერების მონაწილეობით თურქეთში გაიმართოს. აქ დიდი პასუხისმგებლობა ეკისრება მოლაპარაკების დელეგაციებს. თუ ასე გაგრძელდა, მჯერა, რომ კონფლიქტის დროებითი გადაწყვეტა მიღწეული იქნება. ყველას აქვს თავისი კოზირი, რომელსაც ჯერ არ ამჟღავნებს. ჩვენ ვცდილობთ შევქმნათ ხელსაყრელი პირობები", — თქვა მან.

ცნობისთვის, თურქეთის პრეზიდენტმა რეჯეფ თაიფ ერდოღანმა განაცხადა, რომ უკრაინის პრეზიდენტ ვოლოდიმირ ზელენსკისა და კრემლის ლიდერ ვლადიმერ პუტინს შორის შეხვედრის ორგანიზებაზე იმუშავებს.

უკრაინისა და რუსეთის წარმომადგენლებს შორის მშვიდობიანი მოგვარების მიზნით გამართული მესამე შეხვედრა სტამბოლში 23 ივლისს შედგა. პირველი რაუნდი 16 მაისს გაიმართა, ხოლო მეორე — 2 ივნისს.