დიდი ბრიტანეთის პრემიერმინისტრმა კირ სტარმერმა განაცხადა, რომ ბრიტანეთის მთავრობა პალესტინის სახელმწიფოს მხოლოდ იმ შემთხვევაში აღიარებს, თუ ეს სამშვიდობო შეთანხმების ნაწილი იქნება. ამის შესახებ ინფორმაციას Reuters ავრცელებს.

ხუთშაბათს, საფრანგეთის პრეზიდენტმა ემანუელ მაკრონმა განაცხადა, რომ ქვეყანა პალესტინის სახელმწიფოებრიობას აღიარებს — რაც ისრაელმა და აშშ-მა მკაცრად გააკრიტიკეს.

დიდი ბრიტანეთის პრემიერმინისტრმა ეს განცხადება მას შემდეგ გააკეთა, რაც საფრანგეთის პრეზიდენტ ემანუელ მაკრონთან და გერმანიის კანცლერ ფრიდრიხ მერცთან ღაზაში ომის დასრულების გზებზე ისაუბრა. სტარმერმა აღნიშნა, რომ იგი რეალური შედეგების მომტან "პრაქტიკულ გადაწყვეტილებებზეა" კონცენტრირებული.

"პალესტინის სახელმწიფოს აღიარება ამ ნაბიჯების ნაწილი უნდა იყოს. ამ საკითხში მე მტკიცე ვარ. მაგრამ ეს უნდა იყოს ფართო გეგმის ნაწილი, რომელიც საბოლოოდ ორი სახელმწიფოს პრინციპის აღსრულებითა და პალესტინის და ისრაელის მოსახლეობის მდგრადი უსაფრთხოებით დასრულდება", — განაცხადა სტარმერმა.

მანამდე, 220-ზე მეტმა პარლამენტარმა სტარმერს წერილით მიმართა და მას პალესტინის აღიარებისკენ მოუწოდებით.

მიუხედავად იმისა, რომ ბრიტანეთის ყველა წინა მთავრობა აცხადებდა, რომ აღიარება მაშინ მოხდება, როდესაც დრო შესაფერისი იქნება, კონკრეტული ვადები ან პირობები არასდროს განუსაზღვრავთ.