ახალქალაქის, კუმურდოსა და კარის მიტროპოლიტი ნიკოლოზი, საპატრიარქოსთვის გადაცემულ ტყეებზე, რასაც არასმთავრობო ორგანიზაციები და ოპოზიციის წევრები არ ეთანხმდებოდნენ, ამბობს, რომ ეს ტყის შენარჩუნებისთვის გაკეთდა. ამის შესახებ მან ჟურნალისტებს განუცხადა.

მისი თქმით, ტყეში შესვლას არავინ არავის არ აუკრძალავს.

"ტყის გასხვისება, ტყის გაჩუქება, რას უნდა გულისხმობდეს, ერთადერთი თუ ვინმე გასაჩეხად მოინდომებს. პირობას გაძლევთ, ნამდვილად, რომ ეკლესია, არც სასულიერო პირი, მე არ მეგულება ვინმე ასეთი ბარბაროსი, რომ ტყე მიიღოს, გაყიდოს, გაჩეხოს და აღარ იყოს მერე ტყე. ასეთი რამე არ იქნება. ასე, რომ თუ ტყე მთლიანად გადაეცემა ეკლესიას, ეს იმას ნიშნავს, რომ ეს ტყე შენარჩუნდება და ექნება ყველას და არც ტყეში შესვლას არავინ არავის არ აუკრძალავს", — განაცხადა მეუფე ნიკოლოზმა.

რაც შეეხება კითხვას, საპატრიარქოსთვის მიწების გადაცემა სპეცილურად წინაასაარჩევნოდ იყო თუ არა დაგეგმილი, სასულიერო პირი პასუხობს, რომ თუ ტყე გულისმოსაგებად არ გამოდგება.


წინასაარჩევნოდ თუ ვინმეს უნდა ვინმეს გული მოიგოს, რაღაც ისეთი უნდა აჩუქოს რასაც გამოიყენებს, ტყე რაში უნდა გამოიყენო? მარტო იმაში, რომ არ გააჩეხინო ვიღაცას", — განაცხადა მეუფე ნიკოლოზმა.

საქართველოს პარლამენტმა დაამტკიცა ტყის კოდექსი, რომელიც, მათ შორის, ითვალისწინებს იმას, რომ საპატრიარქოს საკუთრებაში შეიძლება გადაეცეს საქართველოში არსებული ყველა ეკლესია-მონასტრის მიმდებარე ტყის ფართობი, არაუმეტეს 20 ჰექტრისა თითოეულის შემთხვევაში.

ტყის კოდექსის ამ ჩანაწერს აკრიტიკებენ არასამთავრობო ორგანიზაციები, მათ ამის შესახებ არაერთი განცხადება გაავრცელეს. ისინი ცვლილებების ამ ფორმით მიღებას ეწინააღმდეგებიან. ტოლერანტობის და მრავალფეროვნების ინსტიტუტის (TDI) განცხადებით, ინიციატივა დამატებით ქონებრივ და ფინანსურ პრივილეგიებს ანიჭებს დომინანტ რელიგიურ ორგანიზაციას, ასევე, არღვევს სახელმწიფოსა და რელიგიის ურთიერთგამიჯვნის კონსტიტუციურ პრინციპს.

TDI აღნიშნავს, რომ სახელმწიფოს მიერ საპატრიარქოსთვის გადაცემული ქონებისა და დაფინანსების მასშტაბი წინაასარჩევნო პერიოდებში იზრდება. მათივე შეფასებით, ეს ხელისუფლების მხრიდან გავლენიანი ინსტიტუტის მიერ პოლიტიკური მხარდაჭერის სურვილით შეიძლება აიხსნას.

კიდევ ერთი არასამთავრობო ორგანიზაციის, ადამიანის უფლებების სწავლებისა და მონიტორინგის ცენტრის (EMC) შეფასებით ცვლილებები ეწინააღმდეგება ფუნდამენტურ კონსტიტუციურ პრინციპებს და მათივე განცხადებით, იგი სტრატეგიული ბუნებრივი რესურსების მართვის და განაწილების უსამართლო პრაქტიკას ქმნის.

EMC-შიც ვარაუდობენ, რომ მართლმადიდებელი ეკლესიისთვის დამატებითი პრივილეგიების გადაცემის ამ ინიციატივას, სავარაუდოდ, წინასაარჩევნო კონტექსტში საპატრიარქოს ლოიალობის მოპოვების ინტერესი აქვს.