ადამიანის უფლებათა დაცვის კომიტეტის თავმჯდომარის, სოფო კილაძის განცხადებით საგანგებო მდგომარეობის გარეშე შეზღუდვების დაწესების შესახებ კანონპროექტი რისკებს შეიცავს "ცუდი ხელისუფლების პირობებში".

"ამ კანონთან დაკავშირებით არსებობს საფრთხეები, თუ გავითვალისწინებთ იმას, რომ ცუდი ხელისუფლების პირობებში ეს საფრთხეები იზრდება. ჩვენ, პარლამენტი ვცდილობთ, ეს რისკები დავაზღვიოთ", — განაცხადა დეპუტატმა.

კილაძე აღნიშნავს, რომ რისკები, რაზეც საუბრობენ, ძლიერი საპარლამენტო კონტროლითა და ზედამხედველობით შეიძლება იყოს განეიტრალებული.

"ჩვენ ვმუშაობთ კანონპროექტის დახვეწაზე. ჩვენთვის ყველაზე კარგი ვარიანტი იქნებოდა არ იყოს პანდემია და არ გვიწევდეს ამ მიმართულებით მუშაობა, მაგრამ ახლა აუცილებელია ზომები მივიღოთ. ეს არის ამოსავალი წერტილი და ვცდილობთ შუალედური ვარიანტი ვიპოვოთ, არ გვქონდეს საგანგებო მდგომარეობა ქვეყანაში. როცა საგანგებო მდგომარეობა უფრო მძიმე ჩარევაა ადამიანის უფლებებში, ვიდრე ეს შეიძლება იყოს წერტილოვნად, როგორც ამ კანონპროექტშია წარმოდგენილი", — აღნიშნა მან.

დეპუტატის თქმით, რაც არ უნდა იდეალური კანონპროექტი ჰქონდეთ მათ, ოპოზიციისგან პროტესტს "მიჩვეულები არიან".

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ცვლილებებს პარლამენტი დაჩქარებული წესით განიხილავს. კანონპროექტის პირველი მოსმენა დღევანდელ პლენარულ სხდომაზეა დაგეგმილი, ხოლო სავარაუდოდ ხვალ, 22 მაისს, მეორე და მესამე მოსმენა იქნება, შემდეგ კი საბოლოო კენჭისყრა.