საქართველოს პრეზიდენტი, სალომე ზურაბიშვილი ფიქრობს, რომ საქართველოს "ძალიან დიდი ბედი" აქვს, რადგან ილია მეორემ ქვეყნის წინამძღვრობა იტვირთა. მისი თქმით, პიროვნულად არაჩვეულებრივი ურთიერთობა აქვს პატრიარქთან, ხოლო როგორც პრეზიდენტი ფიქრობს, რომ კონკორდატი დაბალანსებულია.

"პიროვნულად რომ ვთქვა, არაჩვეულებრივი ურთიერთობა მაქვს პატრიარქთან, რომელიც მიმაჩნია, არის ამ ქვეყნის ერთ-ერთი ლიდერი, წინამძღვარი და ნამდვილად მორალური ძალიან დიდი ავტორიტეტი. ვთვლი, რომ ჩვენ ძალიან დიდი ბედი გვაქვს ამაში, რომ პატრიარქმა საქართველოს წინამძღვრობა იტვირთა ამდენი წელი და საქართველო გაიყვანა იქ, სადაც ვართ დღეს, ეს მისი ძალიან დიდი დამსახურება არის. მე არ მეყოფა სიტყვები, რომ ეს ყველაფერი გამოვხატო დღეს.

მაგრამ არსებობს მეორე ნაწილი, რომელიც არის კონკორდატი, რომლის გარანტორიც მე ვარ და ვთვლი, რომ ძალიან დაბალანსებულია. მე უპრობლემოდ ამის გარანტორი ვიქნები იმიტომ, რომ ვთვლი ქმნის სწორ განაწილებას უფლებების ამ ქვეყანაში, როგორიც უნდა იყოს ამ ქვეყანაში", — განაცხადა მან რუსთავი 2-ის ეთერში.

ასევე, პრეზიდენტი ფიქრობს, რომ ეკლესია პოლიტიკაში ხშირად არ ერევა. მან აღნიშნა, რომ დიდ პატივს სცემს ეკლესიას, მაგრამ ყოველთვის არ ეთანხმება. მაგალითად მან სასულიერო პირები მოიყვანა, რომლებიც კორონავირუსზე ვაქცინაციას ეწინააღმდეგებიან.

"არ ერევა ხშირად და როცა ჩაერევა იცოდეთ, რომ ვიტყვი, როგორც დღეს. ზოგჯერ ჩემზედაც [მოგისმენიათ პოლიტიკური შეფასებები], მაგრამ ჩემს რეაქციას მოვახდენ, როცა ჩავთვლი, რომ მართლა მნიშვნელოვანი არის და საჭირო არის. ჩვენც ვერევით ზოგჯერ", — განაცხადა მან.

სასულიერო პირები, ისევე, როგორც თავად საპატრიარქო არაერთხელ ჩაერიენ მთავრობის გადაწყვეტილებაში. მაგალითად, მათ გააპროტესტეს მარიხუანას კულტივაციის კანონპროექტი და აქციებით იმუქრებოდნენ. პატრიარქთან შეხვედრის შემდეგ, მთავრობას კანონპროექტის უკან გაწვევა მოუწია. ასევე, ბოლო პერიოდში მათ გააპროტესტეს საგანგებო მდგომარეობით დაწესებული შეზღუდვები და საეკლესიო დღესასწაულები კანონის გვერდის ავლით, მთავრობის მინიჭებული პრივილეგიით, აღნიშნეს. ამ გადაწყვეტილების მიღებასაც წინ უძღოდა მთავრობის წევრების შეხვედრა პატრიარქთან.