საქართველოს პარლამენტის წევრი პატრიოტთა ალიანსიდან, ემზარ კვიციანი ამბობს, რომ პარლამენტის პირველ სხდომაზე გაუჭირდა ადაპტაცია გარემოსთან. ამის შესახებ მან გაზეთ ახალ თაობასთან ინტერვიუში განაცხადა.

როგორც ემზარ კვიციანი ამბობს, თავიდან პასიურობა და პროცესებზე დაკვირვება არჩია:

"პარლამენტის პირველმა სხდომამ ის დრო გამახსენა, ტყეში რომ წამიყვანეს პირველად. თავიდან არ ვიცოდი, რა უნდა გამეკეთებინა, მერე ნელა ყველაფერი ავითვისე და ახლა ტყეში თავს კარგად ვგრძნობ. პარლამენტში ისე რომ ვიგრძნობ თავს, როგორც ტყეში, მაშინ უკვე კარგად იქნება ყველაფერი. პარლამენტს თავისი ტექნიკა აქვს და მის გამოყენებას სწავლება სჭირდება. კი აგვიხსნეს რაღაცები, მაგრამ, ცოტა არ იყოს, გამიჭირდა. არაფერია, ტყეშიც ეგრე გამიჭირდა და მერე ყველაფერი ავითვისე".

როგორც პარლამენტარი ამბობს, მისთვის ყველაზე რთული რეპლიკისა და განცხადების გასაკეთებლად თადარიგის დაკავების წესის დამახსოვრება გახდა:

"ეს ტექნოლოგია პირველ დღეს ვერ ავითვისეთ, რეაგირებასაც ვაგვიანებდით და ამიტომ აღარ ვიაქტიურე ძალიან. ნაციონალებს თუ ჰგონია, რომ სულ ასე იქნება, მწარედ სცდებიან".

ემზარ კვიციანის თქმით, პატრიოტთა ალიანსი ჯერჯერობით შორიდან აკვირდება შიდასაპარლამენტო პროცესებს და აქტიურობასაც სიტუაციის შესწავლის შემდეგ აპირებენ.

ემზარ კვიციანი ედუარდ შევარდნაძის მმართველობის დროს პრეზიდენტის რწმუნებული იყო კოდორის ხეობაში. ვარდების რევოლუციის შემდეგ ის თანამდებობიდან გადადგა და რამდენიმე ასეულ თანამოაზრესთან ერთად ხელისუფლებას დაუმორჩილებლობა გამოუცხადა. 2005 წელს გააუქმეს კვიციანის გასამხედროებული დაჯგუფება "მონადირე", რომელიც ოფიციალურად თავდაცვის სამინისტროს ექვემდებარებოდა. 2006 წელს ჩატარებული სპეცოპერაციის შედეგად კი მისი წევრები განიარაღეს. ემზარ კვიციანი აფხაზეთის გავლით რუსეთში გაიქცა. მას გასამხედროებული დაჯგუფების შექმნისა და ამბოხისთვის სასამართლომ 12-წლიანი პატიმრობა მიუსაჯა. კვიციანი საქართველოში 2014 წელს დაბრუნდა, პროკურატურამ მასთან საპროცესო შეთანხმება გააფორმა, რის შემდეგაც სასამართლოს გადაწყვეტილებით, ის საპატიმრო სასჯელისგან გათავისუფლდა. ემზარ კვიციანი 2015 წლიდან პატრიოტთა ალიანსის წევრია.

2016 წლის 8 ოქტომბრის საპარლამენტო არჩევნების შედეგად, საკანონმდებლო ორგანოში ამ პარტიის 6 წევრი მოხვდა.