სტატისტიკის ეროვნული სამსახურის ანგარიშის თანახმად, კორონავირუსის პანდემიის ფონზე, აპრილში წლიური ინფლაციის დონე (ფასების საერთო დონე) 6,9 პროცენტი იყო. წლიური ინფლაციის ზრდაზე ყველაზე დიდი გავლენა (5,04 პროცენტი) ჰქონდა სურსათისა და უალკოჰოლო სასმელების ჯგუფს. ამ ჯგუფში ფასები 16,1 პროცენტით გაიზარდა.

ფოტო: საქსტატი

ფასები მომატებულია შემდეგ ქვეჯგუფებზე: ხილი და ყურძენი (45.4 პროცენტი), რძე, ყველი და კვერცხი (23,2 პროცენტი), შაქარი, ჯემი და სხვა ტკბილეული (16.9 პროცენტი), ხორცი და ხორცის პროდუქტები (15.0 პროცენტი), თევზეული (14.9 პროცენტი), ბოსტნეული და ბაღჩეული (14.1 პროცენტი), ზეთი და ცხიმი (11.0 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (10.0 პროცენტი), ყავა, ჩაი და კაკაო (10.0 პროცენტი) და პური და პურპროდუქტები (8.4 პროცენტი).

საქსტატის გამოთვლით, ფასების ზრდა დაფიქსირდა სამედიცინო პროდუქციის, აპარატურისა და მოწყობილობების (8.4 პროცენტი) და ამბულატორიულ სამედიცინო მომსახურების (4.4 პროცენტი) ქვეჯგუფებზე.

ფოტო: საქსტატ

საქსტატი განმარტავს, რომ პანდემიის გამო ფასების შეგროვებისას გამოკითხვის პერიოდში 1 800 ობიექტიდან დროებით არ ფუნქციონირებდა 1 150 ერთეული. ამის გამო საქსტატმა ფასების მონაცემთა ბაზის საერთო რაოდენობის მხოლოდ 40 პროცენტამდე მოიძია.