თბილისის მე-17 საერთაშორისო კინოფესტივალი სულ მალე, 28 ნოემბერს დაიწყება და 4 დეკემბრის ჩათვლით გაგრძელდება.

ფესტივალის ფარგლებში ტრადიციულად იქნება პროგრამა ქართული პანორამა, რომელიც 2016 წლის 20 ყველაზე მნიშვნელოვან, მხატვრულ და დოკუმენტურ ფილმს გააერთიანებს.

პროგრამის სრულმეტრაჟიანი მხატვრული ფილმებიდან აღსანიშნავია რუსუდან გლურჯიძის სხვისი სახლი, რომელიც სხვა რამდენიმე კონკურსთან ერთად, წლევანდელი კარლოვი ვარის კინოფესტივალის გამარჯვებულია.

ფილმი ხანმოკლე, მაგრამ გამანადგურებელ ომში ფიზიკურად გადარჩენილი ორი ოჯახის შესახებ მოგვითხრობს. ისინი ნაჩქარევად გამოთავისუფლებულ სახლებს იკავებენ, მაგრამ მშვიდობიან გარემოში ახალი ცხოვრების დაწყება არ შეუძლიათ, რადგან ომი ყოველდღიურ ცხოვრებაში გრძელდება.

ნინო ბასილიას სოციალური დრამა ანას ცხოვრება, რომელიც რამდენიმე მნიშვნელოვანი ჯილდოს, მათ შორის პალმა დე მალიორკასა და Arras Film Festival-ის გამარჯვებული გახდა, ქართული პანორამის გარდა მონაწილეობას მიიღებს საერთაშორისო საკონკურსო სექციაშიც.

წელს არანაკლებ საინტერესოა ფესტივალის დოკუმენტური ფილმების ჩამონათვალიც. მაყურებელი ბოლო დროის ერთ-ერთ გამორჩეულ ნამუშევარს, სალომე ჯაშის დაისის მიზიდულობას იხილავს.

ფილმი რეგიონული სატელევიზიო არხის საშუალებით დასავლეთ საქართველოს ერთი პატარა ქალაქის ფსევდო-ეთნოგრაფიულ პორტრეტს ქმნის, სადაც რიტუალები და ტრადიციები, ნორმები და დოგმები ცხოვრების წესს განსაზღვრავს და სადაც თანამედროვე მსოფლიოს ანარეკლიც იჭრება.

თბილისის მე-17 საერთაშორისო კინოფესტივალი რამდენიმე ფილმის ქართულ პრემიერასაც უმასპინძლებს, მათ შორის იქნება:

ლევან კოღუაშვილის გოგიტას ახალი ცხოვრება, რომელიც ამსტერდამის დოკუმენტური ფილმების საერთაშორისო ფესტივალის საკონკურსო პროგრამაში მონაწილეობდა. ფილმში ასახულია ციხიდან გამოსული გოგიტას ისტორია, რომელიც 14 წელი იხდიდა სასჯელს;

ასევე, ლაიფციგის დოკუმენტური ფილმების საერთაშორისო კინოფესტივალის გამარჯვებული რეჟისორის, მარიამ ჭაჭიას ფილმი - მოუსმინე სიჩუმეს.

რაც შეეხება მოკლემეტრაჟიან ფილმებს: ფესტივალის ქართულ პანორამაში წარმოდგენილია წინანდლის პრემიის ლაურეატი დეა კულუმბეგაშვილის ლეთა, რომლის მსოფლიო პრემიერაც კანის კინოფესტივალის სექციაში "რეჟისორთა ორკვირეული" შედგა და გიორგი თოდრიას დაკარგული სოფელი, რომელიც 81-ზე მეტ კინოფესტივალზე აჩვენეს და 21 ჯილდოს მფლობელია.

სექციაში ასევე დაგეგმილია შემდეგი ფილმების ჩვენება:

  • ანა სარუხანოვა, დღის ბოლომდე,
  • გიორგი მუხაძე, ანას მოლოდინში,
  • თენგო ასიტაშვილი და გიორგი ოქრიაშვილი, ტრაგედია უგმიროდ და
  • ხათუნა ხუნდაძე, სერიოზული კაცი.

თბილისის მე-17 კინოფესტივალზე შედგება რეჟისორ რეზო ესაძის ახალი ნამუშევრის თვე, როგორც ერთი დღე პრემიერა.