ვიცე-პრემიერის, მაია ცქიტიშვილის თქმით, მთავრობისა და საპატრიარქოს ოქროს შუალედი მოქალაქეების ჯანმრთელობაზე ზრუნვა, ნორმალურ ვითარებაში სწრაფად დაბრუნება და ქვეყნის განვითარებაა.

"რა თქმა უნდა, მაქსიმალურად დაინტერესებული ვართ, რომ თითოეული მართლმადიდებლისთვის ძალიან მნიშვნელოვანი დღეების განმავლობაშიც სახლიდან გასვლისგან შევიკავოთ თავი. ეს ეხება უკლებლივ ყველა გადაადგილებას და ემსახურება მხოლოდ და მხოლოდ იმას, რომ შევზღუდოთ კონტაქტები ჩვენს თანამოქალაქეებს შორის", — თქვა მაია ცქიტიშვილმა.

ვიცე-პრემიერის განცხადებით, სახლში დარჩენასთან დაკავშირებით შეზღუდვები ეხება არა მხოლოდ საეკლესიო რიტუალებს, არამედ ყველას. მისი თქმით, უახლოესი 2-3 კვირა ძალიან მნიშვნელოვანი პერიოდი იქნება, რომელიც განსაზღვრავს როგორ განვითარდება დაავადება საქართველოში. ცქიტიშვილის აზრით, თუ ვირუსის გავრცელების დინამიკა უკონტროლოდ არ გაიზარდება, მაისის შუა რიცხვებიდან ეკონომიკის "გაცოცხლებაზე" ფიქრი დაიწყება.

ბოლო მონაცემებით, საქართველოში კორონავირუსით 306 ადამიანია ინფიცირებული, მათ შორის 69 გამოჯანმრთელებულია, 3 კი გარდაცვლილი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: