Secret აპი პირველად 2014 წელს გაეშვა და რამდენიმე ტრანსფორმაციისა და რედიზაინის შემდეგ დაიხურა. რადგან, როგორც მისი შემქმნელები ამბობდნენ, მიზანი, რომელიც ამ აპლიკაციის შექმნისას ჰქონდათ არ გამართლდა.

თავდაპირველად, აპლიკაცია საიდუმლოებების ანონიმურად გასაზიარებლად გამოიყენებოდა და მასში უამრავი შავ-ბნელი ამბავი გავრცელდა. მომხმარებლები მილიონობით ადამიანების წინაშე წერდნენ, რომ ღალატობდნენ მეუღლეს, ან სამსახურში გამიზნულად აფუჭებდნენ რაღაცას და ა.შ. დროთა განმავლობაში აპლიკაცია პორნოგრაფიისა და კიბერბულინგის არხად გადაიქცა.

აპლიკაციამ შარშან აპრილში შეწყვიტა არსებობა, აშშ-ს საპრეზიდენტო არჩევნების შედეგების გამოცხადების შემდეგ კი, აპის ერთ-ერთმა დამაარსებელმა დევით ბაიტოუმ Facebook-ზე დაწერა, რომ Secret-ის აღდგენას აპირებს:

"Secret V2 მალე იქნება. ის ძალიან მნიშვნელოვანია და უნდა არსებობდეს".

Techcrunch-თან საუბრისას ბაიტოუმ განაცხადა, რომ სოციალური მედიის არსებული არხები გამოწვევებს ვერ უძლებს, რადგან ხალხს საკუთარი აზრის ღიად დაფიქსირება და ავთენტურობის შენარჩუნება უჭირთ.

აპლიკაციის გამოსვლის ზუსტი დრო ჯერ-ჯერობით უცნობია.