თეოლოგი, ყოფილი მღვდელი, ბასილ კობახიძე ამობს, რომ საპატრიარქოს ლოგიკა ფანატიზმია და მათი ღმერთი იესო ქრისტხე და ყოვლადწმინდა სამება არაა. ამის შესახებ მან სპეციალურ ვიდეო მიმართვაში ისაუბრა.

ბასილ კობახიძის აზრით, იმის ნაცვლად, რომ ეპიდემიის დროს საპატრიარქომ ლომის წვლილი არ შეიტანოს ხალხის ინფიცირებაში და ეკლესიები ერთი თვით, თვე-ნახევრით დახუროს, ის პოზიციას არ ცვლის.

"მათ აქვთ თავისი ლოგიკა, ფანატიზმს აქვს თავისი ლოგიკა. მე ვიცი, რაზედაც ვლაპარაკობ, რადგანაც მრავალი წელი ვიყავი ამ ლოგიკაში, როგორც მრევლი და როგორც მღვდელი. ამიტომაც, არგუმენტებით საუბარი ეს იქნება სამედიცინო, სახელმწიფოებრივი, საზოგადოებრივი გნებავთ, თეოლოგიური არგუმენტები - საპატრიარქოსთან და პატრიარქთან, სამღვდელოებასთან და ეპისკოპოსებთან, ასეთ დიალოგს აზრი არ აქვს. მათ აქვთ თავისი ლოგიკა, ცხოვრობენ თავის სამყაროში და ყავთ თავისი ღმერთი, რომელიც არის ბოროტი არსება, როგორიც მაგალითად მოლოქი, რომელსაც სჭირდება ადამიანების მსხვერპლშეწირვა და ეს არ არის იესო ქრისტე და ყოვლადწმინდა სამება", — ამბობს ბასილ კობახიძე.

თეოლოგმა ბასილ კობახიძემ, რომელიც ამჟამად საფრანგეთში ცხოვრობს ვიდეო ცოტა ხნის წინ გამოაქვეყნა. ის მიმართვაში ეპიდემიაზე ეკლესიის დამოკიდებულებასთან დაკავშირებით არაერთ საკითხს ეხება.

6 აპრილის მონაცემებით, საქართველოში კორონავირუსით ინფიცირების 188 შემთხვევაა დაფიქსირებული. მათგან ორი პაციენტი გარდაიცვალა, 39 კი უკვე გამოჯანმრთელდა. ამ დრომდე კარანტინის რეჟიმში რჩება 5 056 ადამიანი, სტაციონარში მეთვალყურეობის ქვეშ — 386.

კორონავირუსი დაუდასტურდა საჩხერის მერის ცოლს, რომელიც საჩხერის კლინიკის ექიმია. მერი ბენიამინ ფალავანდიშვილი აცხადებს, რომ ინფორმაციის მიღების შემდეგ, თვითიზოლაციაში იმყოფება. ბოლო 2 კვირის განმავლობაში მას არაერთი შეხება ჰქონდა სხვადასხვა პირთან, თუმცა როგორც მუნიციპალიტეტის გავრცელებულ ფოტოებში ჩანს, ის პირბადით და ხელთათმანებით მოძრაობდა.

ჯერ კიდევ აქტუალურ საკითხად რჩება ეკლესიებში წირვა-ლოცვის ჩატარებისას მრევლის დასწრება. როგორც საპატრიარქო აცხადებს, ისინი იცავენ ყველა რეკომენდაციას და ღვთისმსახურების დროს მრევლს მოუწოდებენ, დისტანცია დაიცვან. საპატრიარქოს საზოგადოებასთან ურთიერთობის დეპარტამენტის ხელმძღვანელი, ანდრია ჯაღმაიძე ამბობს, რომ არ მიუღიათ გადაწყვეტილება, თუ რა იქნება აღდგომის დღესასწაულზე, რადგან სიტუაციის განმუხტვას ელოდებიან. მისივე თქმით, კომენდანტის საათის დროს მორწმუნე სახლში უნდა იყოს.

კორონავირუსის გავრცელების პრევენციისთვის საქართველოში 21 მარტს საგანგებო რეჟიმი გამოცხადდა და დამატებითი შეზღუდვები დაწესდა. აღნიშნული ზომები 31 მარტის შემდეგ გამკაცრდა, როდესაც პრემიერ-მინისტრმა გიორგი გახარიამ "ფაქტობრივი კარანტინი" გამოაცხადა. ამოქმედდა ე.წ. კომენდანტის საათი და სამზე მეტი ადამიანის შეკრება აიკრძალა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: