გაეროში ჩავარდა რეზოლუცია, რომელიც, მათ შორის, რუსეთისთვის სანქციების მოხსნას ითვალისწინებდა. დოკუმენტი რუსული მხარის მიერ იყო ინიცირებული.

გაეროში რუსეთის მუდმივი წარმომადგენლობის ინფორმაციით, მათ რეზოლუციაში საუბარი იყო კორონავირუსის პანდემიასთან ბრძოლისას სახელმწიფოების კოორდინირებული მუშაობის მნიშვნელობაზე, ბრძოლის მეთოდების და მკურნალობის გეგმის შემუშავებაზე, უფრო მეტად დაზარალებული სახელმწიფოებისთვის დახმარების აღმოჩენაზე, ასევე, "სავაჭრო ომსა" და სანქციებზე უარის თქმაზე.

რუსული მხარე აღნიშნავს, რომ რეზოლუციის ჩაგდებას ხელი შეუწყვეს საქართველომ, უკრაინამ, დიდმა ბრიტანეთმა, ამერიკის შეერთებულმა შტატებმა და ევროკავშირმა.

ოკუპანტი ქვეყანა მათ "სანქციების პოლიტიკის აპოლოგეტთა მცირე ჯგუფს" უწოდებს და აცხადებს, რომ დოკუმენტის ჩაგდებამ პანდემიის საფრთხესთან გლობალური და სოლიდარული ბრძოლა გაართულა.

რუსული მხარის თქმით, აინტერსებს რა გახდა რეზოლუციის ჩაგდების მიზეზი და სურს დიდი ბრიტანეთისგან, აშშ-სგან და ევროკავშირისგან პოზიცია წერილობით მიიღოს, ხოლო მოხარულები იქნებიან, თუ "ამ ძალისხმევისგან გაათავისუფლებენ" საქართველოს და უკრაინას. ოკუპანტი სახელმწიფო ამბობს, რომ როგორც წესი, უკრაინისა და საქართველოს არგუმენტები პოლიტიზებულია.

ამასთან, რუსული მხარის ინფორმაციით, რეზოლუციის ჩაგდების მიუხედავად, აგრძელებენ კოორდინაციას თანამოაზრეებთან და ფიქრობენ, რომ დოკუმენტს ბევრი ქვეყანა შეუერთდება.