23 მარტია, ორშაბათი, საშუალოზე მეტად თბილი დღე, თუმცა თბილისი ადამიანებისგან გამოიხშირა — სამსახურები დაკეტილია, პარკინგები ცარიელი.

საქართველოში საგანგებო მდგომარეობის გამოცხადების შემდეგ, სასურსათო მაღაზიების გარდა, თითქმის ყველა სავაჭრო ობიექტი დაიხურა. გარეთ გასვლას მხოლოდ აუცილებლობის შემთხვევაში გვირჩევენ. როგორც აღმოჩნდა, ამ გზას თვითგადარჩენისთვის ბევრი მიმართავს.

გლდანში, სადაც 220 ათასი მოსახლე და 37 ათასი სოციალურად დაუცველი ცხოვრობს, დაკეტილ სავაჭრო ცენტრებს თუ არ ჩავთვლით, ყველაფერი ისეა, როგორც კორონავირუსამდე. ახმეტელის მეტროს მიმდებარედაც ქუჩები კვლავ გადატვირთულია, არის საცობი და ხალხმრავლობა ტროტუარებზე, ავტობუსის გაჩერებებზე. და რა თქმა უნდა, უცვლელი ინფრასტრუქტურული სამუშაოები გზებზე.

საგანგებო მდგომარეობის გამოცხადების შემდეგ დაკეტილი და ცარიელია ქალაქის ორი დიდი სავაჭრო ცენტრი, თბილისი მოლი და ისთ ფოინთი. ტერიტორიაზე მხოლოდ ჰიპერმარკეტი, ბანკები და აფთიაქი მუშაობს.

"ბოლო მატარებელი"

მას შემდეგ, რაც საქართველოს ორ რაიონში კარანტინი გამოცხადდა, 24 მარტის შუაღამიდან აიკრძალა ქალაქებს შორის საზოგადოებრივი ტრანსპორტის მოძრაობაც, მათ შორის, სარკინიგზო მიმოსვლა. წინა საღამოს მგზავრებმა რეგიონში ჩასასვლელად ბოლო შანსი გამოიყენეს.

"დროზე ადრე მივდივარ თბილისიდან. დედას საჭმელი უნდა წავუღო, თორემ ის ვეღარ ჩამოვა და ვეღარაფერს იყიდის. დღეს მატარებლის ბოლო დღეა, უკანვე უნდა წამოვიდე დღესვე, ბავშვი დავტოვე სახლში", — ამბობს ერთ-ერთი მგზავრი, ციცინო, რომელიც სოფელ ქანში მიდის.

ბაქანზე შეკრებილი ადამიანების ნაწილი ვირუსისგან თავის დაცვას პირბადით ცდილობს, თუმცა ერთმანეთთან 1-2-მეტრიანი დისტანცია არ აქვთ. ამის საშუალება არც მატარებლის ვაგონში ექნებათ.

"სიცოცხლის და ჯანმრთელობის გულისთვის ბევრ რამეს ავიტანთ, აბა რა ვქნათ? ხომ არ გავწყდებით?", — გვეუბნება მგზავრი ნეჟნა, რომელიც ქვემო ხვითში მიემგზავრება. გვიყვება, რომ, რაც შეეძლო, ყველაფერი მოიმარაგა იზოლაციაში ყოფნისთვის. ისიც დროზე ადრე ტოვებს ქალაქს:

"ბავშვები სოფელში მყავს, ჰაერზე. გვითხრეს, გზა იკეტებაო და დავეშურეთ. აუცილებელი ყველაფერი შევიძინეთ და მიგვაქვს, მაგრამ აპრილამდე ძალიან გაგვიჭირდება. ან წამალი გვინდა, ან პროდუქტი...".

ერთი დღით ადრე დაიკეტა ავტოსადგური ოკრიბაც, საიდანაც ყოველდღიურად ადამიანები დასავლეთ საქართველოს მიმართულებით მგზავრობდნენ. გამგზავრების მოლოდინში მყოფებს მხოლოდ რამდენიმე კერძო მიკროავტობუსი და "მინივენი" დახვდათ, რომლებიც ბოლო მარშრუტს ასრულებდნენ რაიონებში.

სივრცე

სადგურებიდან თბილისის ცენტრალურ ქუჩებზე დაბრუნებულს განსხვავებული სურათი დამხვდა. პირველი განცდა არის "სივრცე", რაც რუსთაველის გამზირზე და თავისუფლების მოედანზე შეიძლება დაგეუფლოს. აქ მარტივია სოციალური დისტანცირებაც, რაც ვირუსის წინააღმდეგ ბრძოლისთვის ერთ-ერთი მთავარი რეკომენდაციაა. ქუჩაში გამვლელი რომ დაინახო, უნდა დაელოდო.

საქართველოში საგანგებო მდგომარეობა 21 აპრილამდეა დაწესებული. უცნობია, კიდევ გაგრძელდება თუ არა მკაცრი შეზღუდვების, სწავლისა და ბიზნესის გაჩერების ვადა. ქვეყანაში კორონავირუსით ინფიცირების რიცხვი დღითიდღე მცირედით, თუმცა მაინც იმატებს. ამ დროისთვის სულ 67 დადასტურებული შემთხვევაა.

• რა შეზღუდვებს ითვლისწინებს საგანგებო მდგომარეობა