აშშ-ს საელჩო რამდენიმე ქვეყნის ერთობლივ განცხადებას ავრცელებს, სადაც ნათქვამია, რომ ოკუპირებული აფხაზეთის რეგიონში ჩატარებულ ე.წ. საპრეზიდენტო არჩევნების ლეგიტიმურობას არ აღიარებენ.

განცხადებაში ჩამოთვლილი ქვეყნებია:ბულგარეთი, ჩეხეთის რესპუბლიკა, კანადა, ესტონეთი, ფინეთი, ირლანდია, ლატვია, ლიეტუვა, ნორვეგია, პოლონეთი, რუმინეთი, შვედეთი, უკრაინა, გაერთიანებული სამეფო და ამერიკის შეერთებული შტატები.

აღნიშნული სახელმწიფოები, კვლავ ადასტურებენ სრულ მხარდაჭერას საქართველოს ტერიტორიული მთლიანობისა და სუვერენიტეტის მიმართ მის საერთაშორისოდ აღიარებულ საზღვრებში და საქართველოს ტერიტორიის განგრძობადი ოკუპაციის გამო ღრმა შეშფოთებას გამოთქვამენ.

"ჩვენ კიდევ ერთხელ მოვუწოდებთ რუსეთის ფედერაციას, შეასრულოს ევროკავშირის შუამდგომლობით მიღწეული 2008 წლის 12 აგვისტოს ცეცხლის შეწყვეტის შესახებ შეთანხმებით ნაკისრი ვალდებულებები, მათ შორის, გაიყვანოს საკუთარი ძალები საომარი მოქმედებების დაწყებამდე არსებულ პოზიციებზე და უზრუნველყოს ამ რეგიონებში ჰუმანიტარულ დახმარებაზე ხელმისაწვდომობა. ჩვენ ასევე მოვუწოდებთ რუსეთს, უკან წაიღოს საქართველოს აფხაზეთისა და სამხრეთ ოსეთის რეგიონების ე.წ. დამოუკიდებლობის აღიარება", — ნათქვამია განცხადებაში.

ქვეყნები, ასევე, სრულ მხარდაჭერას უცხადებენ ჟენევის საერთაშორისო ფორმატის მოლაპარაკებებს.

აფხაზეთში 22 მარტს გამართულ ე.წ. საპრეზიდენტო არჩევნებში ასლან ბჟანიამ გაიმარჯვა.