დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

ჯანდაცვის მინისტრის, ეკატერინე ტიკარაძისა და დაავადებათა კონტროლის ცენტრის ხელმძღვანელის, ამირან გამყრელიძის თქმით, კორონავირუსის პანდემიასთან დაკავშირებით ქვეყანა 3 სცენარისთვისაა მზადყოფნაში. ჯანდაცვის მინისტრმა, დღეს, 12 მარტს, მთავრობის სხდომის შემდეგ, განმარტა, თუ რას გულისხმობს 3 სცენარი.

მინისტრის თქმით, პირველი სცენარია, როდესაც ქვეყანაში პანდემია მსუბუქად და ნაკლები ინფიცირებული პაციენტით გადაივლის, თუმცა, პროცესი შეიძლება შედარებით ხანგრძლივი იყოს.

მისივე განმარტებით, არის, ასევე, საშუალო სცენარიც, რომელიც შეიძლება 12 კვირას გაგრძელდეს და ქვეყანაში რამდენიმე ასეული დაინფიცირებული პაციენტი იყოს.

მინისტრი განმარტავს კიდევ უფრო რთულ სცენარსაც, რომლის დროსაც, მისი თქმით, ქვეყანას შეიძლება ვირუსით დაინფიცირებული 400-მდე მძიმე პაციენტი ჰყავდეს, რომელთა მართვაც მარტივი არ იქნება. თუმცა, ტიკარაძის თქმით, ქვეყანის ინფრასტრუქტურა და სამედიცინო პერსონალი ამ საგანგებო მდგომარეობაში მუშაობისთვის უკვე მომზადებულია.

როგორც ეკატერინე ტიკარაძე ამბობს, ამ ეტაპზე ქვეყანას შეუძლია მშვიდად იყოს, მაგრამ "მოდუნების" საფუძველი არაა და მობილიზება აუცილებელია.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა მუშაობის საგანგებო რეჟიმზე გადავიდა და ახალი შეზღუდვები და რეკომენდაციები გაავრცელა.

საქართველოში კორონავირუსით ინფიცირების 24 შემთხვევაა დადასტურებული: პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა, კიდევ 1 შემთხვევა კი — 11 მარტს.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: