საჯარო მოხელეების 66 პროცენტის აზრით, თანაბარი პროფესიული კვალიფიკაციის პირობებში, კაცები ქალებზე უფრო ხილვადები არიან. ამის შესახებ საუბარია კვლევაში, რომელიც ქალი და კაცი საჯარო მოხელეების კარიერული გზის განსხვავებულობას ეხება.

კვლევა გაეროს განვითარების ფონდისა (UNDP) და დიდი ბრიტანეთის მთავრობის ხელშეწყობით ინფორმაციის თავისუფლების განვითარების ინსტიტუტმა (IDFI) ჩაატარა.

კვლევის შედეგების მიხედვით, ქალი და კაცი საჯარო მოხელის კარიერული გზა განსხვავებულია. ქალი საჯარო მოხელეები თვლიან, რომ უფროსები მათ მეტად საყვედურობენ და ნაკლებად სცემენ პატივს, ვიდრე კაცებს. კვლევის თანახმად, საჯარო მოხელეების 71 პროცენტი მიიჩნევს, რომ კაცები უფრო სწრაფად აღწევენ წარმატებას.

"ანგარიშის კითხვისას, განსაკუთრებით ერთმა სიტყვამ გამაკვირვა: "უხილავი". ეს სიტყვა მთელს ანგარიშში მეორდება: უხილავი ბარიერები, უხილავი იერარქია და უხილავი პრაქტიკა — ის, რაც ქალებს უხილავს ხდის. უფრო სწორად, ისინი მხოლოდ ქალებისთვის ტრადიციულად მიჩენილ როლში გვევლინებიან, რაც მორჩილებასა და კრიტიკის მიმართ შეგუებას გულისხმობს და, შედეგად, ქალები, კაცებთან შედარებით, კარიერულ წინსვლას ნაკლებად აღწევენ", — აღნიშნა საქართველოში UNDP-ის ხელმძღვანელმა, ლუიზა ვინტონმა.

UNDP-ის კვლევის ძირითადი მიგნებები:

• კარიერულ გზაზე მამაკაცთა უპირატესობა მიღებულია იმ ფონზე, როდესაც რესპოდენტთა 70 პროცენტი მიიჩნევს, რომ ქალები უფრო მეტად ფლობენ კარიერული წარმატების შესახებ თეორიულ ცოდნას;
• მეოთხე რანგის საჯარო მოხელეების 81 პროცენტი აღნიშნავს, რომ კარიერულ გზაზე კაცები უფრო სწრაფად აღწევენ წარმატებას. ეს მაჩვენებელი რანგების ზრდასთან ერთად ეტაპობრივად იკლებს და პირველი რანგისათვის შეადგენს 59 პროცენტს;
• მხოლოდ 6 პროცენტი მიიჩნევს რომ, საჯარო სამსახურში კარიერის განვითარების სიტემა ძალიან ეფექტურია, ხოლო 26 პროცენტი ფიქრობს, რომ ეფექტურია;
• განათლების სხვადასხვა საფეხურზე ქალები უკეთეს აკადემიურ მიღწევებს აჩვენებენ, მაგრამ როგორც კი ხვდებიან საჯარო სამსახურში, ხდება მათი "შეჩერება";
• ქალების წარმატებისკენ სვლა მათი აკადემიური მაჩვენებლების პირდაპირპროპორციული არ არის;
• რადგან ქალები უფრო მომთმენნი არიან, ნაკლებად აღწევენ კარიერულ წარმატებას და ამჯობინებენ ჩრდილში ყოფნას;
• თუ ქალი მომთმენი არ არის და კრიტიკულია, ესეც ხელს უშლის წარმატების მიღწევაში.

UNDP-ის თანახმად, კვლევაში გამოყენებული იყო როგორც რაოდენობრივი, ისე ხარისხობრივი მეთოდოლოგია, რომელიც მოიცავდა ქალი და კაცი საჯარო მოხელეების, როგორც ჩაღრმავებულ გამოკითხვას, ისე ფოკუს ჯგუფებთან მუშაობას, ცენტრალურ და ადგილობრივ დონეზე.

მათივე განცხადებით, რაოდენობრივ ონლაინგამოკითხვაში მონაწილეობა მიიღო 1010-მა საჯარო მოხელემ (676 ქალი და 334 კაცი). სიღრმისეული ინტერვიუ ჩატარდა 26 პირველი და მეორე რანგის საჯარო მოხელესთან (15 ქალი და 11 კაცი). ფოკუს ჯგუფებში მონაწილეობა მიიღო 13-მა საჯარო მოხელემ (7 ქალი და 6 კაცი).