"თავისუფლება, თანასწორობა, სოლიდარობა", "სოლიდარობა ზვარელ მუშებს", "სოლიდარობა მუშებს", "მოვითხოვთ რეალურ შრომის ინსპექციას", "მშრომელთა სიცოცხლე საფრთხეშია" - ამ ლოზუნგებით, დღეს აქცია-მსვლელობა გაიმართა. თბილისის სოლიდარობის ქსელის ორგანიზებული აქციის მონაწილეები სოფელ ზვარეში მომხდარი ინციდენტის გასაპროტესტებლად ბრითიშ პეტროლეუმის ოფისთან შეიკრიბნენ და საქართველოს რკინიგზის შენობისკენ მსვლელობა მოაწყეს.

დროდადრო კი ჩერდებოდნენ და მოსახლეობას პროტესტის მიზეზს განუმარტავდნენ.

მოქალაქეები მოითხოვდნენ:

1. დადგეს ადგილობრივი მენეჯმენტის პასუხისმგებლობის საკითხი და შინაგან საქმეთა სამინისტრომ მიანიჭოს ინციდენტს შესაბამისი კვალიფიკაცია.
2. ამ დრომდე, მომხდარზე პასუხისმგებლობას არ იღებს საქართველოს რკინიგზა, მიუხედავად იმისა, რომლის ქვეკონტრაქტორიც არის აღნიშნული კომპანია. რკინიგზაში აცხადებენ, რომ ზვარეში მომხდარი ინციდენტი სხვა კომპანიის შიდა პროცესებია, რომელზეც საქართველოს რკინიგზა ვერ გააკეთებს კომენტარს.
3. რკინიგზის ადმინისტრაცია სასწრაფოდ ჩაერთოს პროცესში და აიღოს შესაბამისი პასუხიმგებლობა მის ქვეკონტრაქტორ კომპანიაზე. საზოგადოებისთვის ცხადი უნდა გახდეს თუ როგორ და რა გზით შემოვიდა საქართველოში მსგავსი დამსაქმებელთა ჯგუფი.
4. ანაზღაურდეს იძულებითი მოცდენა საქართველოს რკინიგზის მიერ, იმის გათვალისწინებით, რომ ამჟამად გამოძიების მიერ ობიექტზე სამუშაო პროცესი შეჩერებულია.
5. ხაზი უნდა გაესვას იმას, რომ ზვარეს შემთხვევა არ არის პირველი და არ უნდა მიენიჭოს ამ თემას შოვინისტური ხასიათი.

შეკრებილ ადამიანებს მიმართა რკინიგზელთა ახალი პროფკავშირის წარმომადგენელმა. მისი თქმით, ზვარეში შეკრებილია 80-მდე მუშა, ზვარეს მოსახლეობა, დაზარალებულების ოჯახის წევრები და სოფელ ქარელის მოსახლეობაც:

"ისინი მოითხოვენ, რომ კომპანია ჩინეთის რკინიგზის 23-ე ბიურომ დატოვოს სამშენებლო ობიექტი. ეს არის მათი მოთხოვნა და ამ მოთხოვნის დაკმაყოფილების გარეშე ისინი არ აპირებენ დაშლას."

ხაზი გაესვა საზოგადოების ნაწილში გაჩენილ ქსენოფობიურ განწყობასაც. გვანცა ხონელიძის თქმით, კონკრეტულ საქმეში ეროვნება არაფერ შუაშია და შეკრების მიზანი მშრომელთა უფლებების დაცვაა:

"უკვე ვუსმენდი იმ დისკურსს, რომ ჩინელები, ან ეროვნება მნიშვნელობს ამ მომენტში. ჩვენი მკაფიო მესიჯი იქნება ის, რომ აქ ეროვნება არაფერ შუაშია. მჩაგვრელი იქნება ჩინელი, იქნება ქართველი, თუ ნებისმიერი სხვა წარმომავლობის, ყველანაირი ნაციონალისტური დისკურსი უნდა გამოვრიცხოთ. უნდა ვფოკუსირდეთ იმაზე, რომ ჩვენი მიზანია, დავიცვათ მშრომელი და არ გავაღვივოთ მტრობა კონკრეტულ ეროვნებებს შორის. ვითხოვთ რეგულაციებს, ვითხოვთ ქმედით მედიაციას, ვითხოვთ ქმედით შრომის ინსპექციას."

"თქვენ მარტო არ ხართ. თბილისშიც ფიქრობენ თქვენზე. სოლიდარობა ზვარეს! სოლიდარობა მუშებს." - თქვა ლევან ლორთქიფანიძემ.

2 ნოემბერს, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. თავდაპირველად, შინაგან საქმეთა სამინისტრომ On.ge-ს განუცხადა, რომ აღნიშნულ ფაქტთან დაკავშირებით გამოძიება სისხლის სამართლის კოდექსის 125-ე მუხლით დაიწყო, რაც ცემას გულისხმობს. 3 ნოემბერს, დღის ბოლოს, სხეულის განზრახ ნაკლებად მძიმე დაზიანების ბრალდებით, ჩინეთის სახალხო რესპუბლიკის სამი მოქალაქე დააკავეს.

• ასევე წაიკითხეთ:
  რატომ იღუპებიან და სახიჩრდებიან ადამიანები სამუშაო ადგილებზე საქართველოში