პრემიერ-მინისტრ გიორგი გახარიას თქმით, საქართველოში კორონავირუსის დაფიქსირების გამო პანიკის საფუძველი არ არსებობს. ამის შესახებ მან მთავრობის სხდომის დაწყების წინ განაცხადა.

მისივე თქმით, მთავარია გავითვალისწინოთ ჯანდაცვის მსოფლიო ორგანიზაციის ყველა ის რეკომენდაცია, რომელიც მედიის საშუალებით აქამდეც ვრცელდებოდა.

"ჩვენ არ გვაქვს პანიკის საფუძველი. ჯანდაცვის სამინისტრო, შესაბამისი უწყებები და შექმნილი საკოორდინაციო უწყებათაშორისი საბჭო სრულად აკონტროლებენ სიტუაციას", — აღნიშნა გახარიამ.

მან გაწეული სამუშაოსთვის მადლობა გადაუხადა ჯანდაცვის სამინისტროს თანამშრომლებს, მესაზღვრეებსა და საბაჟოს თანამშრომლებს.

26 თებერვალს საქართველოში კორონავირუსის პირველი შემთხვევა დაფიქსირდა. ვირუსი დაუდგინა საქართველოს მოქალაქეს რომელიც აზერბაიჯანის გავლით საქართველოში გუშინ შემოვიდა ირანიდან. ის გადაყვანილია ინფექციურ საავადმყოფოში

ბრიფინგზე ჯანდაცვის მინისტრმა, ეკატერინე ტიკარაძემ განაცხადა, რომ შესამოწმებლად გადაიყვანეს ის მესაზღვრეები, რომლებმაც კორონავირუსით ინფიცირებული პაციენტი აღმოაჩინეს. მისივე თქმით, ამ ეტაპზე პაციენტის ჯანმრთელობას საფრთხე არ ემუქრება და ქვეყანაში ეპიდემიის საფრთხე არ არსებობს.

ბრიფინგზე ცნობილი გახდა, რომ ჯანდაცვის სამინისტრო აფთიაქებს პირბადეების შემოტანაში დაეხმარება. მინისტრის განცხადებით, ამ დროისთვის საგანმანათლებლო დაწესებულებებში სწავლის შეწყვეტა არ იგეგმება.

ამავე თემაზე:

დაავადებათა კონტროლის ცენტრის ცხელი ხაზი 116 001.