ინფრასტრუქტურის მინისტრის, მაია ცქიტიშვილის თქმით, ქართული ოცნების დაპირება საერთაშორისო პარტნიორებთან არის ის, რომ ნებისმიერი საარჩევნო სისტემის პირობებში თავისუფალი და დემოკრატიული არჩევნები ჩატარდება.

"თქვენ დარწმუნდით ძალიან ბევრი როგორც პარლამენტარის, ასევე, სენატორისა და კონგრესმენის გამოსვლებში, რომ საქართველო თავად უნდა ჩამოყალიბდეს იმაზე, თუ რა ტიპის საარჩევნო სისტემა აწყობს საქართველოს. ჩვენი დაპირება საერთაშორისო პარტნიორებისადმი იყო ის, რომ ჩვენ უზრუნველვყოფთ ნებისმიერი საარჩევნო სისტემის პირობებში თავისუფალ, დემოკრატიულ და გამჭვირვალე არჩევნებს, რომელიც იქნება დასტური იმისა, რომ ჩვენი განვითარება დემოკრატიის ხარისხი არის უმაღლეს დონეზე", — თქვა მაია ცქიტიშვილმა.

მინისტრმა აღნიშნა, რომ კონგრესმენების, სენატორებისა და საერთაშორისო პარტნიორების გამოხმაურება ნიშნავს, მათ სურვილს, რომ საქართველოს დემოკრატიული განვითარება იყოს შეუქცევადი.

ოპოზიციის ლიდერებსა და ხელისუფლებას შორის საარჩევნო სისტემასთან დაკავშირებით დიალოგი გიგი უგულავას დაკავების შემდეგ შეწყდა. გუშინ, 25 თებერვალს ღამით აშშ-ს ელჩის მოადგილის რეზიდენციაში ოპოზიციის ლიდერების, დიპლომატებისა და ხელისუფლების წარმომადგენლების შეხვედრა გაიმართა. ღონისძიების გამართვის შესახებ მედიისთვის ცნობილი არ იყო. შენობის დატოვების შემდეგ ოპოზიციონერებმა თქვეს, რომ შეხვედრის ორგანიზატორი აშშ-ს ელჩის მოადგილე იყო. ოპოზიციის ლიდერების თქმით, შეხვედრაზე არანაირ კონკრეტულ საკითხზე შეთანხმება არ მომხდარა.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".