დღეს, 25 ნოემბერს, XI მოწვევის პარლამენტის პირველი სხდომა 12:00 საათზე სახალხო პროტესტის ფონზე გაიხსნება.

მანამდე, 9 საათზე, პარლამენტის უკანა შესასვლელთან დაიწყება აქცია "დაიბრუნე ხმა".

მთავრობის ადმინისტრაციის პრესსამსახურის ცნობით, 25 ნოემბერს, 10:00 საათზე, საქართველოს მთავრობის ადმინისტრაციაში პრემიერ-მინისტრ ირაკლი კობახიძის ბრიფინგი გაიმართება.

საქართველოს პარლამენტში 25 ნოემბერს უსაფრთხოების ყვითელი დონე იმოქმედებს. გავრცელებული განცხადების თანახმად, შენობაში დაგეგმილ საპარლამენტო ღონისძიებაზე მხოლოდ შესაბამისი სტრუქტურული ერთეულების მიერ მოწვეული პირები დაიშვებიან. მათივე ცნობით, შენობაში ასევე დაიშვებიან ტელემაუწყებლების/ტელემედია საშუალებების აკრედიტებული არაუმეტეს ორი ჯგუფი თითო მაუწყებლიდან.

საქართველოს კანონმდებლობით, ახალარჩეული პარლამენტის პირველ სხდომას პრეზიდენტი ნიშნავს და ხსნის. თუმცა, 2024 წლის საპარლამენტო არჩევნების შედეგების არაღაირების შემდეგ, პრეზიდენტმა სხდომა არ დანიშნა და შესაბამისად არც პირველ სხდომას გახსნის.

პარლამენტის რეგლამენტის თანახმად, სხდომაზე პრეზიდენტის არყოფნის შემთხვევაში, სხდომას პარლამენტის უხუცესი წევრი გახსნის. ასეთი ქართული ოცნების წარმომადგენელი ლადო კახაძეა.

რეგლამენტის მიხედვით, პარლამენტს არჩევნების შედეგებს ცესკოს თავმჯდომარე გააცნობს და სამანდატო კომისიას პარლამენტის წევრთა უფლებამოსილების ცნობისთვის საჭირო დოკუმენტაციას გადასცემს.

პარლამენტის სრული შემადგენლობის არანაკლებ ორი მესამედის უფლებამოსილების ცნობის შემდეგ, პარლამენტის წევრები ქვეყნისადმი ერთგულების ფიცს დებენ.

ფიცის ტექსტს კითხულობს ცესკოს თავმჯდომარე: "მე, სრულიად საქართველოს წარმომადგენელი და მისდამი ანგარიშვალდებული, ღვთისა და ერის წინაშე ვაცხადებ, რომ კეთილსინდისიერად აღვასრულებ პარლამენტის წევრის უფლება-მოვალეობებს, ვიქნები კონსტიტუციური წყობილების, ქვეყნის დამოუკიდებლობის, ერთიანობისა და მთლიანობის, ხალხის ინტერესების, მოქალაქეთა უფლებებისა და თავისუფლებების, საქართველოს ძლევამოსილების დაცვის სამსახურში".

ფიცის ტექსტის წაკითხვის შემდეგ, პარლამენტის წევრები წარმოთქვამენ "ვფიცავ" და ხელს მოაწერენ ტექსტს, რის შემდეგაც საქართველოს სახელმწიფო ჰიმნი შესრულდება.

ქართული ოცნების გარდა, არც ერთი ბარიერგადალახული პარტია ცესკოს მიერ გამოქვეყნებულ შედეგებს არ აღიარებს და პარლამენტში შესვლას არ აპირებს.

ცესკოს ოფიციალური მონაცემებით, XI მოწვევის პარლამენტში 5 პოლიტიკური სუბიექტი შევიდა, ქართულ ოცნებას 89 მანდატი აქვს, კოალიციას ცვლილებებისთვის — 19 მანდატი, ენმ-ს — 16 მანდატი, ძლიერი საქართველოსთვის — 14 მანდატი, პარტიას გახარია საქართველოსთვის — 12 მანდატი.