ქართული ოცნების ყოფილი დეპუტატებისგან შემდგარი ფრაქცია, დამოუკიდებელი დეპუტატები, მზად არის, რომ მმართველი გუნდის მიერ ოპოზიციისთვის შეთავაზებული საარჩევნო მოდელით, 100/50-ით, 2020 წლის არჩევნების ჩატარებას მხარი დაუჭიროს. ამის შესახებ ფრაქციის წევრმა, ლევან კობერიძემ დღეს გამართულ ბრიფინგზე განაცხადა.

ასევე, დამოუკიდებელი დეპუტატების ფრაქციას შეთავაზება აქვს, რომ 2020 წლის არჩევნებში მონაწილეობა ყველა მოქალაქისთვის სავალდებულო გახდეს.

"ფრაქცია დამოუკიდებელი დეპუტატები გთავაზობთ კომპრომისულ წინადადებას, რომელიც ოთხ ძირითად პუნქტს ეფუძნება. პირველი — 2024 წლიდან აუცილებლად შენარჩუნდეს პროპორციული საარჩევნო სისტემა; მეორე — თუკი 2020 წლებსა და 2024 შორის დადგება ვადამდელი საპარლამენტო არჩევნების ჩატარების აუცილებლობა, არჩევნები ჩატარდეს იმავე პრინციპით, რაც ამოქმედდება 2020 წლის საპარლამენტო არჩევნებისათვის", — განაცხადა ლევან კობერიძემ.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველი გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.