საქართველოს დემოკრატიული ინიციატივის (GDI) კვლევაში "გამოხატვის თავისუფლება საქართველოში" ნათქვამია, რომ ხელისუფლების სამივე შტო მიზანმიმართულად ცდილობს მაქსიმალურად შეამციროს გამოხატვის თავისუფლებით დაცული სფეროს ფარგლები.

ანგარიშში წერია, რომ ხელისუფლების ყველა შტო ერთობლივად ცდილობს მაქსიმალურად მოთოკოს მისდამი კრიტიკული აზრის არსებობა საკანონმდებლო ჩარჩოს გამკაცრებით, ადმინისტრაციული პრაქტიკისა თუ, სასამართლოს გადაწყვეტილებების გზით. GDI-ის ანგარიშში ნახსენებია ხელისუფლების მხრიდან გამოხატვის თავისუფლების სხვაფასხვა მიმართულების შეზღუდვის მაგალითები და ტენდენცია.

"ხელისუფლება სამართლებრივ ჩარჩოს უგულებელყოფით ზღუდავს შეკრებისა და მანიფესტაციის უფლებას. ხშირ შემთხვევაში სამართალდამცავი ორგანოები შერჩევითი სამართლიანობის პრინციპით რეაგირებენ მანიფესტანტთა ქმედებებზე. სამართალდამცავები განსაკუთრებით მკაცრი მიდგომით ხელისუფლების მიმართ კრიტიკული აზრის გამომხატველი მანიფესტაციის მიმართ გამოირჩევიან", — ნათქვამია ანგარიშში.

GDI საუბრობს მანიფესტანტთა წინააღმდეგ სასამართლო პრაქტიკაზეც. მათი თქმით, პრაქტიკა აჩვენებს, რომ შეკრება-მანიფესტაციის უფლებით სარგებლობის პროცესში დაკავებულ პირებს განსაკუთრებულ მძიმე სანქციებს უფარდებენ.

ანგარიშში საუბარია იმაზეც, რომ პარალელურად, ძალადობრივი და ულტრანაციონალური ჯგუფების მართლსაწინააღმდეგო ქმედებებზე არაადეკვატურად რეაგირებენ. :

"ეს გაუმართლებელ ტვირთად აწვება უმცირესობათა გამოხატვის თავისუფლებას, აფერხებს ტოლერანტული და პლურალისტული საზოგადოების ჩამოყალიბებას".

GDI "სავავალო ტენდენციას" უწოდებს იამს, რომ ხელისუფლების მიერ მედიის მიმართ წარმოებულ პოლიტიკას:

"რიგ შემთხვევაში ხელისუფლებას შერჩევითი სამართლიანობის პრინციპით პირდაპირი იერიში მიაქვს დამოუკიდებელ და თავისუფალ მედიაზე (აჭარის საზოგადოებრივი მაუწყებელი, ტვ კავკასია, ტვ პირველი და სხვა), ხოლო გარკვეულ შემთხვევაში სისხლისსამართლებრივ დევნას ახორციელებს ტელემაუწყებლების ხელმძღვანელი პირების მიმართებით".