ქართული ოცნების გენერალური მდივანი და თბილისის მერი, კახა კალაძე ამბობს, რომ პროპორციული საარჩევნო სისტემის ჩავარდნა მისთვის სამწუხაროა, მაგრამ ამით კანონი არ დარღვეულა.

"მეც, არჩილიც [თალაკვაძე] და სხვა ბევრი კიდევ თანაპარტიელები იყო მომხრე იმის, რომ მომხდარიყო საარჩევნო სისტემის ცვლილება. თუმცა გარკვეული დეპუტატების წინააღმდეგობით, ამას სჭირდებოდა მხარდაჭერა, სჭირდებოდა საკონსტიტუციო უმრავლესობა ამ ცვლილებას. სამწუხაროდ, ვერ მოხერხდა და ჩავარდა ცვლილება. ჩვენ ყველაფერი გავაკეთეთ იმისთვის, რომ ეს შესრულებულიყო... თუმცა სამწუხაროდ, ეს ჩვენი პრობლემაა, ჩვენი პარტიის პრობლემაა, ჩვენი შიდა პრობლემაა რაც სამწუხაროა, ძალიან ცუდია რომ ასე მოხდა, თუმცა ჩვენ არც კანონი და არც კონსტიტუცია არ დაგვირღვევია", — თქვა ჟურნალისტებთან საუბრისას კახა კალაძემ.

ქართული ოცნების გენერალური მდივანი პროპორციულ სისტემაზე გადასვლას სხვადასხვა დროს სხვადასხვაგვარად აფასებდა. 2019 წლის 24 ივნისის ის ამბობდა, რომ ეს "უპრეცედენტო გადაწყვეტილება" იყო და შეაფასა, როგორც დემოკრატიისთვის წინგადადგმული ნაბიჯი. 2020 წლის 21 იანვრის კი თქვა, რომ ქვეყნის ინტერესებიდან გამომდინარე არ ემხრობოდა პროპორციულს და ქვეყნის სტაბილურობისთვის არსებული სისტემა იდეალურია.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. იანვრის ბოლოს, მოლაპარაკებათა მეხუთე რაუნდი უნდა გაიმართოს.