ლონდონში მცხოვრებმა 6 წლის ბავშვმა საშობაო მისალოც ბარათში შემთხვევით აღმოაჩინა ხელნაწერი, რომლის ავტორიც ჩინეთის ციხიდან შველას ითხოვდა. Sunday Times-ის ცნობით, ეს შემაშფოთებელი გზავნილი ბრიტანული სუპერმარკეტების ქსელის, Tesco-ს ერთ-ერთ ჩვეულებრივ მაღაზიაში შეძენილ ბარათზე იყო დაწერილი.

"ჩინეთში, ქალაქ შანხაიში მდებარე ციხის უცხოელი პატიმრები ვართ, რომლებსაც მუშაობას გვაიძულებენ. გთხოვთ, გვიშველეთ და ადამიანის უფლებების დაცვის ორგანიზაციებს შეატყობინეთ" — ვკითხულობთ ბარათზე არსებულ ხელნაწერ ტექსტში.

ბარათზე აღმოჩენილი შეტყობინების ირგვლივ გამოწვეული მედიის დაინტერესების შემდეგ მაღაზიათა ქსელმა Tesco-მ ამ პროდუქციის მწარმოებელ კომპანიასთან თანამშრომლობა გამოძიების დასრულებამდე შეწყვიტა. აღსანიშნავია, რომ ამ მისალოცი ბარათის მწარმოებელი კომპანია სწორედ შანხაიში აღნიშნული ციხის მახლობლად მდებარეობს.

შეტყობინებაში ასევე აღნიშნული იყო, რომ მისი მიმღები ჟურნალისტ პიტერ ჰამპრის დაკავშირებოდა, რომელიც 2013 წლიდან 2015 წლამდე სწორედ შანხაის ციხის პატიმარი იყო.

ფოტო: Twitter

მისალოცი ბარათების მწარმოებელი კომპანია Zhejiang Yunguang Printing აცხადებს, რომ იძულებითი შრომის ბრალდება უსაფუძვლოა და მათ არასდროს უთანამშრომლიათ ციხესთან. მაღაზიათა ქსელ Tesco-ს ოფიციალური წარმომადგენლის მიერ New York Times-ში გაკეთებული განცხადების თანახმად კი, ნოემბერში ეს ჩინური მომწოდებელი დამოუკიდებლად შეამოწმეს და ციხის პატიმრების შრომა არ დადასტურებულა.

ამ შემთხვევას გამოეხმაურა ჩინეთის საგარეო საქმეთა მინისტრიც და ამ ბრალდებას ჟურნალისტ ჰამპრის მიერ გამოგონილი "ფარსი" უწოდა. ჟურნალისტს კი სჯერა, რომ ეს შეტყობინება იმ პატიმრებმა დაწერეს, რომლებიც მასთან ერთად შანხაის ციხის საკანში იყვნენ. მათი უსაფრთხოების გამო კი მათ სახელებს არ ასახელებს.

New York Times-ის ცნობით, შეტყობინება 6 წლის ფლორენს ვიდიკომბმა აღმოაჩინა, რომელიც ერთი კვირის წინ თავისი კლასელებისთვის მისალოც საშობაო ბარათებს ამზადებდა. წარწერის ნახვის შემდეგ ფლორენსის მამა ჟურნალისტ პიტერ ჰამპრის LinkedIn-ის საშუალებით დაუკავშირდა, როგორც ამას ბარათზე არსებული წარწერის ავტორი ითხოვდა.

ჯერჯერობით რთული დასადგენია შეტყობინების ავთენტურობა, თუმცა ეს პირველი შემთხვევა არ არის, როცა მსგავსმა შემთხვევამ საერთაშორისო დაინტერესება გამოიწვია. მაგალითად, 2012 წელს ორეგონის შტატში მცხოვრებმა ქალმა აღმოაჩინა წერილი, რომლის ავტორიც ამბობდა, რომ ჩინეთის ერთ-ერთი სამუშაო ბანაკის ტყვე იყო, რომელსაც იძულებით ამუშავებდნენ და ჰელოუინის დეკორაციებს ამზადებინებდნენ. პატიმარი, რომელმაც წერილი დაწერა, 2010 წელს გათავისუფლდა და მედიაში გასული რეპორტაჟების შემდეგ დაადასტურა, რომ წერილის ავტორი თავად იყო.