ქართული ოცნების დიდუბის მაჟორიტარი დეპუტატობის კანდიდატი, ილია წულაია მიიჩნევს, რომ 2015 წელს პარლამენტის მიერ საპოლიციო გამოსახლების წესის გაუქმება სწორი გადაწყვეტილება არ იყო და მას, სავარაუდოდ, ახალი მოწვევის პარლამენტი გადახედავს.ამის შესახებ წულაიამ ბიზნესკონტრაქტს განუცხადა:

"ყველაზე საინტერესო საკანონმდებლო ინიციატივა, წინა მოწვევის პარლამენტის პირობებში მოგების გადასახადის გაუქმება იყო. რაც შეეხება უარყოფითს, ყველა შემთხვევაში ხდება რაღაც შეცდომების დაშვება. საპოლიციო გამოსახლების ინსტიტუტის გაუქმება ჩემი აზრით არ იყო სწორი გადაწყვეტილება და მე ვფიქრობ ახალი პარლამენტი გადახედავს ამ ინიციატივას, რომ უფრო მეტად მოქნილი გახდეს საქართველოში ბიზნესის კეთება".

წულაიას თქმით, ის აქტიურად ჩაერთვება სამშენებლო კოდექსის შემუშავებაში. როგორც დეპუტატობის კანდიდატი ამბობს, მშენებლებს დაუწესდებათ რეგულაციები ხარისხის უზრუნველსაყოფად.

ილია წულაია, მაჟორიტარი დეპუტატობის კანდიდატობამდე, თავად იყო ჩართული სამშენებლო ბიზნესში. ის ერთ-ერთი ყველაზე მსხვილი სამშენებლო კომპანია, არქი ჯგუფის გენერალური დირექტორი იყო.

რაც შეეხება საპოლიციო გამოსახლებას, ეს წესი საქართველოს პარლამენტმა 2015 წლის დეკემბერში აკრძალა. კანონის მიხედვით, თუ კერძო საკუთრებაში უკანონოდ იმყოფება სხვა პირი, მაგალითად, ბინის ყოფილი მფლობელი, ამჟამინდელ მესაკუთრეს, ბანკს, ან სხვა მოვალეს, არ შეუძლია პოლიციას მისი გამოსახლება მოსთხოვოს. ამისთვის საჭიროა სასასამართლოსთვის მიმართვა და სასამართლო ნებართვა, რაც შეიძლება, დროში გაიწელოს. ბანკების ასოციაცია მიიჩნევს, რომ ეს კანონი ზღუდავს კონსტიტუციით გარანტირებულ საკუთრების უფლებას, ამიტომ მათ კანონი საკონსტიტუციო სასამართლოში გაასაჩივრეს, თუმცა სასამართლოს ჯერ გადაწყვეტილება არ გამოუტანია.