ურუგვაის ყოფილი ლიდერი ხოსე მუხიკა, რომელსაც ერთ დროს მსოფლიოში ყველაზე ღარიბ პრეზიდენტს უწოდებდნენ, 89 წლის ასაკში გარდაიცვალა. ინფორმაციას BBC ავრცელებს.

"ღრმა მწუხარებით ვაცხადებთ ჩვენი ამხანაგის, პეპე მუხიკას გარდაცვალების შესახებ", — დაწერა ურუგვაის პრეზიდენტმა იამანდუ ორსიმ სოციალურ ქსელ X-ზე.

ორსის თქმით, მუხიკა არა მხოლოდ პრეზიდენტი, არამედ აქტივისტი, მისაბაძი მაგალითი და ლიდერიც იყო.

"ძალიან მოგვენატრები, ძვირფასო მოხუცო. გმადლობთ ყველაფრისთვის, რაც მოგვეცით და ჩვენი ხალხისადმი თქვენი დიდი სიყვარულისთვის", — დასძინა მან.

მუხიკა მონტევიდეოში 1935 წლის 20 მაისს დაიბადა და ურუგვაის პრეზიდენტად 2009 წელს აირჩიეს. ის ქვეყანას 2015 წლამდე ხელმძღვანელობდა.

ახალგაზრდობაში, 1960-იან და 1970-იან წლებში, ის იბრძოდა ტუპამაროსის მემარცხენე რადიკალურ მოძრაობაში, რომელიც კუბის რევოლუციის იდეებით იყო შთაგონებული და ხელისუფლებასთან საბრძოლველად პარტიზანულ მეთოდებს იყენებდა.

ის ექვსჯერ დაიჭრა და 14 წელი ციხეში გაატარა. სასჯელის უმეტესი ნაწილის განმავლობაში მუხიკა სამარტოო საკანში იმყოფებოდა. ის გაათავისუფლეს 1985 წელს, როდესაც ურუგვაიში დემოკრატია დაბრუნდა.

იანვარში მუხიკამ განაცხადა, რომ საყლაპავის კიბო, რომელიც მას დაუდგინდა, სხვა ორგანოებშიც გავრცელდა და მკურნალობას არ ექვემდებარებოდა, რის გამოც მან უარი თქვა შემდგომ მკურნალობაზე და თანამემამულეებს დაემშვიდობა.

მუხიკა 90 წლის იუბილემდე რამდენიმე დღით ადრე გარდაიცვალა.

მუხიკა ცნობილი გახდა, როგორც მსოფლიოში ყველაზე ღარიბი პრეზიდენტი. ის და მისი მეუღლე ყვავილები მოჰყავდათ და ყიდდნენ. ის პრეზიდენტობის დროს ხელფასის დაახლოებით 90%-ს ქველმოქმედებას ახმარდა და ფერმის გარდა, მისი ერთადერთი ქონება 1987 წლის „"ფოლკსვაგენ ბიტლი" იყო.