ოკუპირებული სამაჩაბლოს დე ფაქტო პრეზიდენტი ანატოლი ბიბილოვი ამტკიცებს, რომ ექიმ ვაჟა გაფრინდაშვილის მიერ ე.წ. საზღვრის კვეთა ქართული პოლიტიკის მიზანმიმართული გაგრძელებაა. ჟენევის დისკუსიების თანათავმჯდომარეებთან შეხვედრისას ის ამტკიცებდა, რომ საქართველო ყოველთვის "პროვოკაციულად" იქცევა დისკუსიების ახალი რაუნდის წინ.

ბიბილოვმა შეხვედრისას არაერთხელ გაუსვა ხაზი წნელისში ქართული საგუშაგოს მშენებლობას და აღნიშნა, რომ ამ საკითხის დარეგულირების გარეშე პრობლემები ვერ მოგვარდება. ის მომხდარზე სრულ პასუხისმგებლობას ისევ საქართველოს აკისრებს და ამტკიცებს, რომ ოსეთის მხრიდან გადადგმულ ნაბიჯები "გასაგები, არაორაზროვანი და ღიაა".

"ყველა სახელმწიფოს წმინდა დამოკიდებულება აქვს სახელმწიფოს საზღვართან... ეს [წნელისის საგუშაგო] თავის მხრივ იმ თოკის ბოლო ნაწილია, რომელსაც უნდა დაქაჩა პრობლემის მოსაგვარებლად. ჩვენ გვთხოვთ მოვაგვაროთ პრობლემები, რომელთანაც არანაირი კავშირი არ გვაქვს", — განუცხადა მან თანათავმჯდომარეებს და მოუწოდა ქართულ მხარეს ურჩიონ სიტუაციის განმუხტვა.

ბიბილოვმა მიმდინარე მოვლენები 2008 წელს შეადარა და აღნიშნა, რომ მაშინაც ქართული მხარის "პროვოკაციები" გამოიწვია დასავლელი კოლეგების დუმილმა. დე-ფაქტო პრეზიდენტის განცხადებებს მის დაქვემდებარებაში მყოფი სააგენტო ავრცელებს.

9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს, მათ შორის ერთ-ერთი ექიმი ვაჟა გაფრინდაშვილი იყო. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს, რადგან მან საზღვრის კვეთა არ აღირა და ამბობდა, რომ საქართველოს ტერიტორიაზეა. საოკუპაციო რეჟიმმა მას ორთვიანი პატიმრობა შეუფარდა