არჩევნების გაყალბების ბრალდების წაყენების შემდეგ ბოლივიის პრეზიდენტი, ევო მორალესი გადადგა. გადადგომისკენ მას არმიის ხელმძღვანელმა და პოლიციის უფროსმა მოუწოდეს.

თვითონ მორალესმა აქციები სახელმწიფოს გადატრიალებად შეაფასა, თუმცა განაცხადა, რომ "ქვეყნის სტაბილურობის" გამო გადადგა.

ბოლივიაში საპრეზიდენტო არჩევნები 20 ოქტომბერს ჩატარდა. მორალესმა 47,1 პროცენტი აიღო, მისმა მთავარმა ოპონენტმა კარლოს მესამ კი — 36,51 პროცენტი. მორალესი ამტკიცებდა, რომ პირველივე ტურში გაიმარჯვა და მეოთხე საპრეზიდენტო ვადისთვის მანდატი მოიპოვა. სწორედ ამან გამოიწვია მოქალაქეების უკმაყოფილება, რის გამოც ისინი აქციებს მართავდნენ.

საერთაშორისო დამკვირვებლებმა განაცხადეს, რომ არჩევნებში დარღვევები აღმოაჩინეს. ამის შემდეგ გადადგნენ სამთო მრეწველობის მინისტრი და პარლამენტის ქვედა პალატის სპიკერი, ხოლო გენერალურმა პროკურატურამ გამოძიება დაიწყო.

10 ნოემბერს ევო მორალესი ვადამდელი არჩევნების დანიშვნასა და საარჩევნო ორგანოს შემადგენლობის შეცვლას დასთანხმდა, თუმცა რამდენიმე საათში მან პრეზიდენტის პოსტი დატოვა.

მორალესი ბოლივიას 2006 წლიდან მართავდა. ის გახდა პირველი ეთნიკური ინდოელი, რომელიც ქვეყნის ლიდერი გახდა.