მენაშენეთა ასოციაცია თბილისის მთავარ პრობლემად ტოქსიკურ ქუჩებს ასახელებს. ტოქსიკური ქუჩებით აღინიშნება ყველა ის ქუჩა, ან გზის მონაკვეთი, სადაც ქვეითისთვის გადაადგილება სახიფათო, მოუხერხებელი და ჯანმრთელობისთვის საზიანოა.

მაგალითისათვის, ტოქსიკურია ის ქუჩა, სადაც მშობელი ეტლით ვერ გაასეირნებს ბავშვს და/ან ტროტუარზე გაჩერებული მანქანები ხელს უშლის ფეხით მოსიარულეებს გადაადგილდნენ შეუფერხებლად.

მენაშენეთა ასოციაციაში აცხადებენ, რომ ტოქსიკური ქუჩების პრობლემა საკმაოდ საგანგაშოა და შესაბამისად კომპლექსურ ჩარევას საჭიროებს. ამისათვის აუცილებელია არსებობდეს სწორი მიდგომა, სტრატეგიული ხედვა და აღნიშნული პრობლემების მოსაგვარებლად, ეტაპობრივი სამუშაოების გეგმა. გადავდოთ გვერდით ჰაერის შემცველობა და ჩვენი ქუჩების სხვა მავნებლობებზე გავამახვილოთ ყურადღება, ვინაიდან სწორედ ამ საკითხების მოუგვარებლობა იწვევს ტოქსიკური გამონაბოლქვის ზრდასა და ჰაერის დაბინძურებას.

მენაშენეთა ასოციაციის თავმჯდომარე ირაკლი როსტომაშვილი თბილისის ქუჩებთან დაკავშირებით მთავარ პრობლემაზე — ტროტუარების არარსებობაზე მიუთითებს. მისი აზრით, თუ არ მოწესრიგდება ტროტუარების სისტემა და გვექნება ამდენი ტოქსიკური ქუჩა, საზოგადოება არ იტყვის უარს მანქანებზე და არ ექნება სურვილი იაროს სამსახურში, თუ უახლოეს მარკეტშიც კი ფეხით. გარემოს დამცველების პირველი რეკომენდაცია კი სწორედ ისაა, რომ მოკლე მანძილებზე თავი უნდა შევიკაოთ ავტომობილებით გადააგილებისგან.

"მოწესრიგებული ტროტუარი ნიშნავს კომფორტულ ადგილს ფეხით გადასაადგილებლად, მოსასვენებელ ადგილებს, კაფეებს, თუ უბრალოდ, შეხვედრის ადგილს. მაგალითად მოვიყვან უნივერსიტეტის ქუჩას. ეს არის თამარაშვილის ქუჩიდან უნივერსიტეტის მაღლივ კორპუსამდე მიმავალი გზა, რომელიც ნაცვლად იმისა, რომ ერთ–ერთი ცოცხალი ქუჩა იყოს თბილისში, აბსოლუტურად ტოქსიკურია. ადგილი, სადაც ყოველდღიურად ათასობით სტუდენტი გადაადგილდება, არ არსებობს ტროტუარი და კომფორტული გადასასვლელები. ამ ქუჩაზე წარმოუდგენელია შშმ პირების ეტლით გადაადგილება. ვერც ბავშვს გაასეირნებ ეტლით", – ამბობს ირაკლი როსტომაშვილი.

მსგავსი ქუჩები თბილისში, სამწუხაროდ, მრავლადაა. ამას ემატება საცობები, რომლებიც გაუვალს ხდის თბილისს.

მენაშენეთა ასოციაცია მიიჩნევს, რომ აუცილებელია არა ავტომობილების სავალი ზოლების, არამედ მათ ხარჯხე ტროტუარების გაფართოება და კეთილმოწყობა.

"მე, მაგალითად, ვაკეში ვცხოვრობ. პოლიტკოვსკაიას ქუჩამდე, სადაც ოფისი მაქვს, სწორედ ამ ტოქსიკური უნივერსიტეტის ქუჩის გავლით, ფეხით მისასვლელად, ზუსტად 1 საათი და 7 წუთი მჭირდება. საცობების პირობებში დაახლოებით იგივე დრო მჭირდება მანქანით მისასვლელად. ფეხით სიარული ჯანმრთელობისთვის რომ კარგია, ამით ახალს არაფერს ვამბობ, მაგრამ ტოქსიკურ ქუჩაზე სიარული იმდენ საფრთხეს მიქმნის, რომ მირჩევნია მანქანით ვიარო სამსახურში", — ამბობს მენაშენეთა ასოციაციის თავმჯდომარე.

სატრანსპორტო პრობლემებში გაუთვითცნობიერებელი ადამიანები ფიქრობენ, რომ საცობებისგან გასათავისუფლებლად აუცილებელია გზების გაფართოება. ეს მოსაზრება რომ მცდარია, ამას ბევრი განვითარებული ქალაქის მაგალითი მოწმობს. ევროპის დედაქალაქებში დიდი ხნის წინ დააკვირდნენ ამ პრობლემას და დაადგინეს, რომ თუ, მაგალითად, 20%–ით აფართოებ გზას, ავტომობილების ნაკადიც ამ გზაზე 20%–ით იზრდება. ეს იმიტომ, რომ ყველა მძღოლი ფიქრობს, უფრო ჩქარა მივა დანიშნულების ადგილამდე იმ გზით, პირობითად, რომლის გაფართოების შესახებაც გავრცელდა ინფორმაცია.

შესაბამისად, გზების განტვირთვის გასაღები სწორედ ქვეითებისთვის უპირატესი გარემოს შექმნაშია. ასეთ პირობებში ადამიანები უბრალოდ უარს იტყვიან საკუთარი მანქანებით გადაადგილებაზე საცობებში, სადაც დროსთან ერთად ბევრ ძვირადღირებულ საწვავსაც ხარჯავენ.

"შეიძლება ვინმეს არ მოუნდეს სახლიდან სამსახურამდე, ან პირიქით, მთელი გზის ფეხით გავლა, მაგრამ ისევ უნივერსიტეტის ტოქსიკური ქუჩის მაგალითი რომ ავიღოთ, მაღლივი კორპუსიდან მოწესრიგებულ ტროტუარზე სიამოვნებით ჩაისეირნებდა ნებისმიერი სტუდენტი, თუ მოქალაქე და უკვე თამარაშვილის ქუჩიდან, რომელიც ერთ–ერთი მნიშვნელოვანი სატრანსპორტო კვანძია დედაქალაქში, ნებისმიერი მიმართულებით ისარგებლებდა საზოგადოებრივი ტრანსპორტით", – ამბობს ირაკლი როსტომაშვილი.

მეტი ადამიანი ტროტუარებზე – გზებზე ნაკლები ავტომობილის პირდაპირპროპორციულია. ასევე, მეტი ადამიანი ტროტუარებზე ნიშნავს მეტ მომხმარებელს კაფეებისთვის, თუ ვაჭრობისა და მომსახურების სხვა ობიექტებისათვის. ეს კი ეკონომიკის ზრდის პირდაპირპროპორციულია. საღამოობით, დატვირთული ტროტუარები თბილისის მეორე ცვლის ეკონომიკას აამუშავებს, რასაც საკმაოდ დიდ ყურადღებას აქცევენ ევროპის დედაქალაქების ადმინისტრაციები.