პრეზიდენტი სალომე ზურაბიშვილი ამბობს, რომ დეკანოზ გიორგი მამალაძის შეწყალების საქმე სენსიტიური საკითხია და დრო სჭირდება.

"ყველას აქვს თავისი წარმოდგენა უნდა შევიწყალო თუ არ უნდა შევიწყალო. სინოდმა თავისი თქვა. მე მომეცით უფლება, რომ ჩემთვის და იმ წესებთან თანხვედრაში, რაც იქნება ამ დღეებში მიღებული, დავფიქრდე და მივიღო გადაწყვეტილება", — განაცხადა მან.

31 ოქტომბერს სინოდის სხდომამ ერთსულოვნად მიიღო გადაწყვეტილება, რომ დეკანოზ გიორგი მამალაძის შეწყალების შუამდგომლობით პრეზიდენტს მიმართოს.

2 ნოემბერს საქართველოს პრეზიდენტის ადმინისტრაციაში განაცხადეს, რომ შეწყალების საქმეების განხილვა არ განახლებულა. პრესსამსახურმა მედიასაშუალებებს პრესრელიზი დაუგზავნა, სადაც ეწერა, რომ დეკანოზ მამალაძის შეწყალებასთნ დაკავშირებულ საკითხებზე გავრცელებული ინფორმაცია არის Fake news და პრეზიდენტზე ზეწოლის მცდელობად აღიქვეს.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.