ცნობილმა ფიზიკოსმა, ბრაიან კოქსმა თანამედროვეობის ერთ-ერთ ყველაზე პარადოქსულ კითხვაზე პასუხის გაცემა სცადა. კითხვა კი ასე ჟღერს: უსაზღვრო კოსმოსში, უთვალავ პლანეტაზე სიცოცხლის აურაცხელი ფორმა უნდა არსებობდეს და რატომ ვერ გადავეყარეთ ვერცერთ მათგანს აქამდე?

ეს კითხვა ახალი არაა და იგი 1950-იანებში იტალიელმა მეცნიერმა, ენრიკო ფერმიმაც გააჟღერა. სიცოცხლის არამიწიერი ფორმების არსებობის მაღალ ალბათობასა და მათთან კონტაქტის არარსებობას შორის არსებულ ალოგიკურობას ფერმის პარადოქსი ეწოდება.

“სად არიან ყველანი?!” რიტორიკულად კითხულობდა ხოლმე იგი.

პროფესორი კოქსი თვლის, რომ ამ კითხვაზე პასუხი აქვს, თუმცა ზუსტად იცის, რომ ეს პასუხი არ მოგვეწონება.

“ფერმის პარადოქსის ჩემეული ახსნა ასეთია: თუ რომელიმე დასახლებულ სამყაროში არსებებს აქვთ საკუთარი თავის განადგურების ტექნოლოგიური შესაძლებლობა, ხოლო ამის თავიდან ასაცილებლად სჭირდებათ დაპირისპირებული მხარეების გლობალური კოლაბორაცია, ასეთ სამყაროს ხანგრძლივი არსებობა არ შეუძლია”, განუცხადა კოქსმა Sunday Times-ს.

“როგორც წესი, მეცნიერება და ტექნოლოგია ყოველთვის წინ უსწრებს პოლიტიკურ ზრდასრულობას და კეთილგონიერებას. ასე რომ, შესაძლებელია, ყველა ცივილიზაცია თვითგანადგურებისთვისაა განწირული და ვერ აღწევს იმ ეტაპამდე, როდესაც სხვა ცივილიზაციებთან კონტაქტს მოახერხებს. ვწუხვარ, მაგრამ მგონია, რომ ჩვენც ამ გზას ვადგავართ”, დაუმატა ფიზიკოსმა თავის არასახარბიელო პროგნოზს.