როგორც ალბათ უკვე იცი, 2024 წლის საბავშვო ევროვიზიის გამარჯვებული საქართველო გახდა. ჩვენს ქვეყანას რეკორდული მეოთხე გამარჯვება 11 წლის ანდრია ფუტკარაძემ მოუტანა, რომელმაც მადრიდში გამართულ კონკურსზე გიგა კუხიანიძისა და მაკა დავითაიას სიმღერა დედას შეასრულა. შოუს დასასრულს, ანდრიამ ჟიურისა და ტელემაყურებლისგან ჯამში 239 ქულა მიიღო.

ახლა კი, ჩნდება კითხვა: ჩატარდება თუ არა 2025 წლის ევროვიზია ჯუნიორი საქართველოში?

ევროვიზიისგან განსხვავებით, საბავშვო ევროვიზიაზე გამარჯვებული ქვეყანა ფესტივალის მასპინძელი მომდევნო წელს ავტომატურად არ ხდება. თუმცა, სწორედ გამარჯვებულ ქვეყანას აქვს უფლება, პირველმა თქვას უარი მასპინძლობაზე. საქართველო კი, როგორც ჩანს, ამ შესაძლებლობის ხელიდან გაშვებას არ აპირებს.

საზოგადოებრივი მაუწყებლის გენერალური დირექტორის, თინათინ ბერძენიშვილის თქმით, საქართველო მზადაა, მომავალი წლის საბავშვო ევროფესტივალს უმასპინძლოს. თუმცა, საბოლოო გადაწყვეტილებას, თუ სად ჩატარდება 2025 წლის ევროვიზია ჯუნიორი, კონკურსის ორგანიზატორი, ევროპის მაუწყებელთა კავშირი, მოგვიანებით მიიღებს.

საქართველომ, რომელმაც საბავშვო ევროვიზია უკვე ოთხჯერ მოიგო, მასშტაბურ მუსიკალურ ფესტივალს 2017-ში, მარიამ მამადაშვილის გამარჯვების მომდევნო წელს უმასპინძლა. კონკურსი მაშინ თბილისის ოლიმპიურ სასახლეში გაიმართა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...