2024 წლის საბავშვო ევროვიზიის სიმღერის კონკურსი საქართველოს გამარჯვებით დასრულდა. ჩვენს ქვეყანას რეკორდული მეოთხე გამარჯვება ანდრია ფუტკარაძემ მოუტანა. მადრიდში გამართულ ევროვიზია ჯუნიორზე 11 წლის მუსიკოსმა გიგა კუხიანიძისა და მაკა დავითაიას სიმღერა დედას შეასრულა და ჟიურისა და ტელემაყურებლისგან ჯამში 239 ქულა დაიმსახურა.

წლევანდელი საბავშვო ევროვიზიის შედეგებზე უფრო დეტალურად ქვემოთ მოგიყვებით: ვინ რა შეფასება დაგვიწერა და როგორ გადანაწილდა ქულები საქართველოდან.

როგორი შეფასების სისტემა მოქმედებს საბავშვო ევროვიზიაზე: კონკურსზე ცალ-ცალკე, თანაბარი პროპორციით ითვლება ჟიურის ქულები და ტელემაყურებლის (ონლაინ ხმის მიცემის) ხმები. 17-ვე მონაწილე ქვეყანაში მუსიკოსებისგან დაკომპლექტებული ჟიური მონაწილეებს 1-7, 8, 10 და 12 ქულით აფასებს: საუკეთესოს უწერს 12 ქულას, მე-2 ადგილზე მყოფს 10-ს, მესამეზე — 8-ს და ა.შ. რაც შეეხება მაყურებელს, ის პროცესში მხოლოდ ონლაინ ხმის მიცემით მონაწილეობს. შესაბამისად, ჯერ განისაზღვრება, ჟიურის ჯამში მაქსიმუმ რამდენი ქულის დაწერა შეუძლია (წელს ეს რიცხვი 986 იყო), შემდეგ კი მიღებული ხმები პროპორციულ ქულებად ნაწილდება მონაწილეებზე.

ჟიურის შეფასება

ჩვენ გარდა 16 სხვა მონაწილე ქვეყნიდან 12-ის ჟიურიმ საქართველოს წარმომადგენელი უმაღლესი ქულით შეაფასა. ანდრია ფუტკარაძემ ყველა ქვეყნის ჟიურისგან ჯამურად 180 ქულა მიიღო და შეფასების ამ ნაწილში უპირობო ლიდერი გახდა.

აი, რა ქულები დაგვიწერეს ევროპულმა ქვეყნებმა:

• 12 ქულა — იტალიისგან, ესტონეთისგან, ალბანეთისგან, სომხეთისგან, კვიპროსისგან, ესპანეთისგან, ნიდერლანდებისგან, სან-მარინოსგან, უკრაინისგან, პორტუგალიისგან, ირლანდიისგან, მალტისგან;
• 10 ქულა — გერმანიისგან, ჩრდილოეთ მაკედონიისგან;
• 8 ქულა — საფრანგეთისგან, პოლონეთისგან.

1-7 ქულა საქართველოს არცერთი ქვეყნისგან არ მიუღია. ეს იმას ნიშნავს, რომ ანდრიას შესრულება არცერთ ჟიურის საუკეთესო სამეულს მიღმა არ დაუყენებია.

ტელემაყურებლის ქულები

ჟიურის შეფასებისგან განსხვავებით, საქართველო ტელემაყურებლის ქულებით ლიდერი არ ყოფილა. მაყურებლისგან ანდრიამ 59 ქულა მიიღო და შეფასების ამ ნაწილში მეექვსე პოზიცია დაიკავა. რადგან ტელემაყურებლის განკარგულებაში 986 ქულა იყო, შეგვიძლია ვიანგარიშოთ, რომ საქართველომ ხმების 5,98% მიიღო.

როგორ გადანაწილდა ქულები საქართველოდან

წლევანდელ ევროვიზია ჯუნიორზე საქართველოს ჟიურის მიერ დაწერილი შეფასება ასე გამოიყურება:

• 12 ქულა — სომხეთს;
• 10 ქულა — საფრანგეთს;
• 8 ქულა — ესპანეთს;
• 7 ქულა — პორტუგალიას;
• 6 ქულა — მალტას;
• 5 ქულა — უკრაინას;
• 4 ქულა — ირლანდიას;
• 3 ქულა — ნიდერლანდებს;
• 2 ქულა — გერმანიას;
• 1 ქულა — ესტონეთს.

ასე დასრულდა რიგით 22-ე საბავშვო ევროვიზიის სიმღერის კონკურსი. ჯერჯერობით უცნობია, რომელი ქვეყანა უმასპინძლებს ევროვიზია ჯუნიორს მომავალ 2025 წელს.