თავდაცვის კომიტეტის თავმჯდომარე, ირაკლი სესიაშვილი ამბობს, რომ დე ფაქტო სამხრეთ ოსეთის შეიარაღებული ძალების მიერ ევროკავშირის დამკვირვებლის დაკავებაზე საქართველოს მთავრობას უმკაცრესი რეაგირება ექნება.

მისი თქმით, ეს არის მშვიდობისა და უსაფრთხოების წინააღმდეგ მიმართული დანაშაული.

"ამაზე გვექნება უმკაცრესი რეაგირება, არა მხოლოდ ჩვენ, არამედ დარწმუნებული ვარ, თავად ევროკავშირის მისიას... ეს პროვოკაცია რუსეთს ნამდვილად არ უნდა გაუვიდეს", — ამბობს სესიაშვილი.

გუშინ, 24 ოქტომბერს ევროკავშირის სადამკვირვებლო მისიამ გაავრცელა ინფორმაცია, რომლის თანახმადაც ჩორჩანა-წნელისის ტერიტორიაზე დე ფაქტო სამხრეთ ოსეთის შეიარაღებულმა ძალებმა ერთ-ერთი დამკვირვებელი დროებით დააკავეს.