20 ივნისის აქციის დაშლიდან ოთხი თვე გავიდა და დაშავებული სამოქალაქო პირებიდან დაზარალებულის სტატუსი უმრავლესობას ამ დრომდე არ აქვს. პროკურატურაში On.ge-ს უთხრეს, რომ ჯერ ამ კუთხით ცვლილებები არ არის.

სტატუსი არ მინიჭებიათ მაკო გომურსა და გიორგი სულაშვილს, რომლებმაც რეზინის ტყვიით თვალი დაკარგეს. ასევე, სტატუსი არ აქვს ჟურნალისტ თამარ ბაღაშვილს, რომელსაც სპეცრაზმელის ნასროლი ტყვია მკლავში მოხვდა. დაზარალებულად ცნობილი არ არის ფოტოგრაფი გურამ მურადოვიც, რომელსაც აქციის დაშლის გაშუქებისას ზურგში, სულ მცირე, ათი რეზინის ტყვია მოხვდა.

7 ოქტომბერს საქართველოს ახალგაზრდა იურისტთა ასოციაციამ გაავრცელა ინფორმაცია, რომ ე.წ. გავრილოვის ღამეს დაზარალებულად 67 სამართალდამცავი და 4 მოქალაქე ცნეს.

დაზარალებულის სტატუსის მინიჭებასთან დაკავშირებით გენერალურ პროკურორს, შალვა თადუმაძეს პარლამენტში დაუსვეს კითხვები. როგორც თადუმაძემ განმარტა, დაზარალებულის სტატუსის მინიჭება ბრალდებულის იდენტიფიცირებას უკავშირდება.

"მოქალაქეების იდენტიფიცირება ხდება ადვილად, რადგან სპეციალური საშუალებებით არ იყვნენ მისული. დაზარალებულის სტატუსი ბრალდებულის მოქმედებიდან გამომდინარეობს და არა პირიქით. როდესაც დაფიქსირებულია კონკრეტული პირის ბრალეული ქმედება და ამ ბრალეული ქმედებით დაზიანებული მოქალაქის სიკეთე, მაშინ ხდება ამ მოქალაქის დაზარალებულად ცნობა", — განაცხადა თადუმაძემ.

პრემიერ-მინისტრი გიორგი გახარია კი ამბობს, რომ "პროცედურები მიმდინარეობს" და მაკო გომური სტატუსს ამის შემდეგ მიიღებს.

20 ივნისის აქცია

20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს პარლამენტთან და სასტუმროსთან, სადაც ასამბლეის წევრები გადაიყვანეს. დღის ბოლოს ისინი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყო On.ge-ს სამი თანამშრომელი.

20 ივნისის საქმეზე გამოძება სისხლის სამართლის კოდექსის 225-ე მუხლით დაიწყო, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.