250 მილიონი წლის წინ ქვეწარმავლებმა ძუძუმწოვრებად ტრანსფორმაცია დაიწყეს. შესაძლოა, სწორედ ამ პერიოდის გამოძახილი იყოს ჩვენს ორგანიზმში დღემდე შენარჩუნებული. ჯერ-ჯერობით უცნობია, თუ რატომ წარმოქმნის ადამიანის ორგანიზმი მსგავსი სახის კუნთებს და შემდეგ რატომ ქრებიან ისინი დაბადებამდე. ბიოლოგების აზრით, ეს შესაძლოა კავშირში იყოს მოქნილი ცერა თითის განვითარებასთან, რაც მას სხვა დანარჩენი თითებისგან გამოარჩევს.

ზოგჯერ ადამიანები დამატებითი თითებით იბადებიან და მათ შესაბამისი დამატებითი კუნთებიც აქვთ განვითარებული. თუმცა, ეს კუნთები არასდროს არის ისე განვითარებული, როგორიც ამჯერად მეცნიერებმა ნახეს ორსულობის მე 13 კვირაზე ჩანასახის 3D სკანირებისას — ისინი ხელის მტევნის ზურგიდან მიემართებოდნენ.

ცერა თითის გარდა, დანარჩენი თითების მომხრელი კუნთები ხელისგულის მხარეს გვაქვს განლაგებული. ცერა თითის მრავალფუნქციურობას სწორედაც ხელის მტევნის ზურგის მხარეს არსებული კუნთები განაპირობებენ.

როგორც ირკვევა, ნაყოფის განვითარების რაღაც ეტაპზე კუნთები ყველა თითისკენ ასევე მტევნის ზურგიდან მიემართებიან. დაბადების შემდგომ ამ კუნთების შენარჩუნება ხშირად კიდურების ანომალიასთან არის მჭიდრო კავშირში. ბიოლოგებს მიაჩნიათ, რომ მათი ეს აღმოჩენა მომავალში ნათელს მოფენს ამგვარი დეფექტების რაობას.

„ჩვენ ცერა თითისკენ მიმავალი ბევრი კუნთი გვაქვს, რომლებიც მის ნატიფ მოძრაობას განაპირობებენ, თუმცა ჩვენ დავკარგეთ სხვა თითებისკენ მიმავალი კუნთების უმრავლესობა. ევოლუციურად, ისინი ჩვენ არც თუ ისე ძალინ გვჭირდება“ — აღნიშნავს მთავარი მკვლევარი, პროფესორი რუი დიოგო.

რატომ გვაქვს ეს კუნთები? სავარაუდოდ, შეუძლებელია ევოლუციის მიმდინარეობისას ვთქვათ: მოდი, სრულად მოვაცილოთ მეორე, მესამე, მეოთხე და მეხუთე თითებს კუნთები და მხოლოდ პირველი თითისკენ მიმართული დავტოვოთ. ალბათ, ეს ასე ადვილი არ არის

რუი დიოგო, მთავარი მკვლევარი

სხეულის უსარგებლო ნაწილები?

პროფესორ დიოგოს მოსაზრებით, ეს სტრუქტურები უფრო მეტად გამოკვეთილია, ვიდრე ევოლუციურად შემორჩენილი სხვა ჩანასახოვანი ნაწილები: აპენდიქსი, სიბრძნის კბილი და კუდუსუნი.

ასევე იხილეთ:

"ეს კუნთები 250 მილიონი წლის წინ დაიკარგა. ჩვენ უფრო მეტი ვიცოდით თევზების, ბაყაყების, ქათმების და თაგვების განვითარების ეტაპების შესახებ. ტექნოლოგიური წინსვლა გვეხმარება ადამიანის განვითარებას დეტალურად დავაკვირდეთ" — შენიშნავს პროფესორი დიოგო.

სერჯიო ალმეცია ანთროპოლოგიის პროფესორია. იგი ადამიანისა და ადამიანის მსგავსი მაიმუნების ევოლუციას შეისწავლის. მისი აზრით, ეს აღმოჩენა ძალზე დასაფასებელია ადამიანის განვითარების კვლევაში, თუმცა იგი ასევე ბევრ კითხვას აჩენს.

კვლევის მთავარი სიახლე ვიზუალიზაციაა — ჩვენ უკვე ზუსტად ვიცით, განვითარების რა ეტაპზე ჩნდება და ქრება კონკრეტული სტრუქტურები. ამჯერად მთავარი კითხვაა: კიდევ რა გამოგვრჩა? რას აღმოვაჩენთ, როდესაც ადამიანის ორგანიზმის განვითარების ეტაპებს მსგავსი სკრუპულოზურობით დავაკვირდებით? რა არის ზოგიერთი სტრუქტურის გაქრობისა და შემდგომ ხელახლა გაჩენის მიზეზი? ჩვენ ახლა შეგვიძლია ვთქვათ, თუ როგორ ხდება ეს ყოველივე, მაგრამ უფრო მნიშვნელოვანი კითხვაა რატომ?“

სერჯიო ალმეცია, ანთროპოლოგი

ბიოლოგები გეგმავენ ადამიანის ორგანიზმის სხვა ნაწილების განვითარებას უფრო დიდი სიზუსტით დააკვირდნენ.

კვლევა ჟურნალში Development გამოქვეყნდა.